Истанбулда қўлбола алкоголдан заҳарланиб вафот этган ўзбекистонликлар сони 17 нафарга етди. Бу ҳақда Бош консулхона матбуот хизмати хабар берди.
Маълум қилинишича, 17 январь куни Туркия ҳудудида қалбаки спиртли ичимлик истеъмол қилиш оқибатида яна 3 нафар Ўзбекистон фуқароси (барчаси эркак) вафот этди. 18 январь ҳолатига кўра, спиртли ичимликдан заҳарланиш сабабли вафот этган ўзбекистонликларнинг умумий сони 17 нафарга етди.
Уларнинг жасадларини Ўзбекистонга юбориш учун Бош консулхона томонидан зарур ҳужжатлар расмийлаштирилмоқда ҳамда оила аъзоларига керакли ёрдам кўрсатилмоқда.
Шу билан бирга, Истанбул ҳудудидаги шифохоналарнинг жонлантириш бўлимларида қалбаки спиртли ичимликдан заҳарланиб даволанаётган Ўзбекистон фуқаролари сони 5 нафарга етди. Консулхона ходимлари уларнинг ҳолидан хабар олиб, яқинлари ва шифохона маъмурияти билан доимий алоқада бўлиб турибди.
“Баъзи ватандошларимиз заҳарланган бўлса-да, уй шароитида даволанишга ҳаракат қилиб, шифохонага бормаган ҳолатлар ҳам аниқланди. Уларга мурожаат қилинганда, шифохонага бориш моддий жиҳатдан қимматга тушиши мумкинлигини айтишди. Бироқ кейинчалик бундай қарорлар буйрак фаолиятининг ишдан чиқиши, кўриш қобилиятининг ёмонлашиши ва нафас олишда муаммолар юзага келишига олиб келмоқда”, дейилади хабарда.
Бош консулхона ҳар қандай ҳолатда ҳам заҳарланиш аломатлари сезилганда 112 қисқа рақами орқали тез тиббий ёрдам чақиртирилиши ҳамда шифохонанинг “қизил ҳудуди” (“kırmızı alan”) орқали қабул қилиниши лозимлигини, бу хизмат бепул эканлигини эслатиб ўтди.
Фуқаролар билан узлуксиз алоқани таъминлаш мақсадида консулхонанинг қуйидаги мобил алоқа рақами +90 553 541 17 17 (24/7 режимида) ишламоқда.
Изоҳ (0)