28 март куни Мьянма ва қўшни Таиландда 7,7 ва 6,4 магнитудали иккита кучли зилзила юз берди. Бангкокдаги Ўзбекистон Бош консулхонасининг хабар беришича, Бангкокдаги қурилиши тугалланмаган бино қулаб тушиши оқибатида 8 киши вафот этган ва 81 нафар киши бедарак йўқолган.
Бош консулхона томонидан зилзиладан сўнг жароҳат олган Ўзбекистон фуқаролари аниқланмади. Бош консулхона Таиланднинг тегишли идоралари билан алоқада ва вазиятни диққат билан кузатиб бормоқда.
Агар ушбу ҳудуддаги Ўзбекистон фуқароларига ёрдам керак бўлса, ушбу рақам орқали боғланиш мумкинлиги айтилди: +66 2 675 3995
Зилзила оқибатлари
Мандалай ва Сикайн шаҳарлари орасидаги Иравади дарёси устидаги кўприк қулаб тушди, тарихий бинолар, жумладан, Чауктожи пагодаси ва ХIX асрга оид Мандалай саройи деворлари шикастланди.
Маҳаллий аҳолининг айтишича, кўплаб уйлар бутунлай вайрон бўлган, одамлар такрорий силкинишлар хавфидан қўрқиб, биноларга қайтишга ботина олмаяпти.
Сўнгги маълумотларга кўра, Мьянмадаги зилзила оқибатида 144 киши ҳалок бўлган, қурбонлар сони яна ортиши мумкин. Бу ҳақда мамлакат давлат маъмурий кенгаши раиси, бош вазир ва катта генерал Мин Аун Хлайн маълум қилган.
Изоҳ (0)