“Экологуз” Telegram каналида “Telegram’даги каналларда ёввойи қушларнинг савдоси авжида” номли хабар эълон қилинди. Унда айтилишича, “Овчилар” Telegram каналида Навоий вилояти Қизилтепа туманида яшовчи фуқаро қўлга ўргатилган лочин қушини сотмоқчилиги тўғрисида эълон жойлаштирган.
“Қуш 100 долларга баҳоланмоқда. Табиатга тегишли мулкни қандай сотиш мумкин? Яна қандай тушунтириш керак одамларга? Улар она табиат бўлаги ҳисобланади. 4 ойлик қуш, албатта, қутқариб қолинади, деб умид қиламиз”, — деган эколог фаоллар.
“Дарё” мухбири лочинни сотувга қўйган шахс билан телефон орқали боғланди, у ҳақиқатан ҳам лочин сотилаётганини тасдиқлаган.
Бу каби ҳолатларда Маъмурий жавобгарлик тўғрисидаги кодекснинг 92-моддаси 2-қисми билан маъмурий баённома расмийлаштирилади. Бундай ҳуқуқбузарлик баъзавий ҳисоблаш миқдорининг 10 баробари — 3,3 миллион сўм жаримага сабаб бўлади.
Апрель охирларида Сурхондарёда хорижлик овчи Қизил китобга киритилган эчкини овлагани юзасидан изоҳ берилган, Қашқадарёда эса Қизил китобга киритилган айиқ отиб ўлдирилгани юзасидан жиноят иши қўзғатилган эди. Тошкентда Қизил китобга киритилган қушларнинг ноқонуний савдосига чек қўйилган, Фарғонада бўри болалари неча пулдан сотилгани маълум бўлганди. Сирдарёда Қизил китобга киритилган саккизта лочинни 280 млн сўмга сотишга уринган шахслар ушланган.
Изоҳ (0)