Qashqadaryo viloyatida ijtimoiy tarmoqlar orqali ovchi qushni noqonuniy sotayotgan fuqaro ushlandi. Bu haqda Ekologiya vazirligi xabar berdi.
Unda aytilishicha, Qashqadaryo viloyati Ekologiya, atrof-muhitni muhofaza qilish va iqlim o‘zgarishi boshqarmasi xodimlari tomonidan fuqaro Sh.M. ijtimoiy tarmoqlar orqali ovchi qush noqonuniy sotilayotgani aniqlandi.
Boshqarma xodimlari holatga chek qo‘yish maqsadida fuqaro bilan xaridor sifatida bog‘landi va qushni sotib olishga kelishishdi. Belgilangan joyda Sh.M. kelishilgan pulni sanab olib, xodimlarga qushni berayotganida ashyoviy dalillar bilan ushlandi.
Qush vaziyatga to‘liq oydinlik kiritilgunga qadar Shahrisabz shahridagi hayvonot bog‘iga vaqtincha topshirildi. Shuningdek, qushning turiga aniqlik kiritish uchun hujjatlar Fanlar akademiyasiga yuborildi. Fanlar akademiyasining xulosasiga asosan zarar miqdori belgilanadi va huquqbuzarga tegishli chora ko‘riladi.
Ma’lumot uchun, avvalroq Toshkent shahri va Farg‘ona viloyatida ham qushlarning noqonuniy savdosiga chek qo‘yilgandi.
Bundan avval Xorazm viloyatining Urganch shahrida noqonuniy saqlanayotgan sher hayvonot bog‘iga topshirilgan edi. Shuningdek, Toshkent shahar Olmazor tumanida fuqaro o‘z uyida Qizil kitobga kiritilgan qushlarni saqlab kelayotgani aniqlangandi.
Izoh (0)