Олий суд раисининг собиқ ўринбосари Баҳодир Деҳқонов сабаб 12 йилга қамалган самарқандлик тадбиркор ҳимоячисининг шикояти қаноатлантирилмади

Бундан аввал «Дарё»да «Олий суд раисининг собиқ ўринбосари Баҳодир Деҳқонов сабаб 12 йилга қамалган самарқандлик тадбиркор Президентдан нажот кутмоқда» номли мақола эълон қилинган. Унда самарқандлик Фарида Бурҳонова турмуш ўртоғи Шерзод Бурҳонов тергов жараёнларининг нотўғри олиб борилиши ва прокуратуранинг судга таъсир кўрсатиши натижасида ноҳақ қамалганлигини билдириб мурожаат қилганди. Олий суд матбуот хизмати ‘‘Дарйў’га шикоятларга боғлиқ суд қарорини тақдим қилди.

Жиноят ишлари бўйича Самарқанд шаҳар судининг 2017 йил 3 февраль кунидаги ҳукмига кўра, Шерзод Бурҳонов Жиноят кодексининг 165-моддаси (товламачилик) 2-қисми «а», «в» бандлари, 168-моддаси (фирибгарлик) 3-қисми «а» банди, 184-моддаси (солиқлар ёки бошқа мажбурий тўловларни тўлашдан бўйин товлаш) 3-қисми, 189-моддаси (савдо ёки хизмат кўрсатиш қоидаларини бузиш), 28, 211-моддаси (пора беришда иштирок этиш) 3-қисми «а» банди ва 243-моддаси (жиноий фаолиятдан олинган даромадларни легаллаштириш)даги жиноятларда айбли деб топилган.

Шерзод Бурҳоновга Жиноят кодексининг 59 (бир неча жиноят содир этганлик учун жазо тайинлаш), 61-моддалари (жазоларни қўшишнинг ҳисоблаш қоидалари) тартибида узил-кесил энг кам ойлик иш ҳақининг 450 баравари, яъни 58 608 000 сўм миқдорида жарима ва 12 йил 6 ой муддатга озодликдан маҳрум қилиш жазоси тайинлаган.

Шерзод Бурҳоновга нисбатан Олий Мажлиси Сенатининг 2016 йил 12 октябрдаги «Ўзбекистон Республикаси Конституциясининг 24 йиллиги муносабати билан амнистия тўғрисида»ги қарорининг 6-банди «б» кичик банди татбиқ этилиб, жазонинг амнистия акти чиққан кунга қадар амалда ўталган муддати чегириб ташланиб, қолган жазоси тўртдан бир қисмига қисқартирилган.

Шерзод Бурҳонов ва унинг ҳимоячилари томонидан келтирилган кассация тартибидаги шикояти жиноят ишлари бўйича Самарқанд вилояти суди кассация инстанциясида кўриб чиқилиб, 2017 йил 23 майдаги ажримига кўра қаноатлантирилмасдан, жиноят ишлари бўйича Самарқанд шаҳар судининг 2017 йил 3 февраль кунидаги ҳукмининг Шерзод Бурҳоновга оид қисми ўзгаришсиз қолдирилган.

Ўзбекистон Олий суди Жиноят ишлари бўйича судлов ҳайъатининг 2018 йил 16 августдаги ажрими билан Шерзод Бурҳоновга нисбатан чиқарилган жиноят ишлари бўйича Самарқанд шаҳар судининг 2017 йил 3 февралдаги ҳукми ҳамда жиноят ишлари бўйича Самарқанд вилояти суди кассация инстанциясининг 2017 йил 23 майдаги ажрими ўзгартирилиб, унинг ҳаракати Жиноят кодексининг 189-моддасидан шу модданинг 1-қисмига қайта квалификация қилиниб, қонунга мувофиқлаштирилиб, тайинланган энг кам ойлик иш ҳақининг 350 баравари миқдоридаги 45 584 000 сўм жарима жазоси ўзгаришсиз қолдирилган.

Шерзод Бурҳоновга Жиноят кодексининг 168-моддаси 3-қисми «а» банди билан ойлик иш ҳақининг 20 фоизини давлат даромади ҳисобига ушлаб қолган ҳолда 3 йил ахлоқ тузатиш ишлари жазоси тайинланган.

Шерзод Бурҳоновга Жиноят кодексининг 184-моддаси 3-қисми, 165-моддаси 2-қисми «а», «в» бандлари, 28, 211-моддаси 3-қисми «а» банди, 243-моддаси билан тайинланган жазолар ўзгаришсиз қолдирилиб, Жиноят кодексининг 59 ва 61-моддалари тартибида тайинланган жазолар қисман қўшиш йўли билан узил-кесил энг кам ойлик иш ҳақининг 450 баравари миқдорида 58 608 000 сўм жарима, 11 йил 6 ой озодликдан маҳрум қилиш жазолари тайинланган.

Суд қарорларининг қолган қисми ўзгаришсиз қолдирилган.

Бундан ташқари, Шерзод Бурҳоновнинг ҳимоячиси О.Мухторова Олий суди раиси қабулида топширган шикояти жиноят иши материаллари асосида ўрганиб чиқилиб, унга 2019 йил 7 март куни Ўзбекистон Республикаси Олий суди раиси томонидан 13-5680-17 рақамли жавоб хати билан берилган шикояти қаноатлантирилмасдан қолдирилганлиги ҳақида маълум қилинган.