1980 йиллар охирида Жанубий Кореянинг Хвасон шаҳрида бир нечта ваҳшиёна қотилликлар серияси аҳолини қўрқувга солганди. Қотилликлар оқибатида 10 нафар қиз ҳалок бўлган, уларнинг энг кичиги 13 ёшли ўсмир эди. 1989 йилда қотил топилган ва умрбод қамоқ жазосига ҳукм қилинганди. Мазкур воқеалардан 30 йил ўтгач бошқа бир эркак — Ли Чун Чже қотилликларни амалга оширганини тан олди. Ли қизларни ўлдирганини айтиб, уларнинг қариндошларидан кечирим сўраган. Шунингдек, у ўзининг ўрнига судланган ва қамоқ жазосини ўтаган Юн исмли шахсдан ҳам ўз узрини сўраган, деб ёзмоқда РТВИ.
80 йилларда Хвасонда тахминан 200 минг нафар аҳоли истиқомат қилган. Қотилликлар ҳам жуда кам содир бўлган. Тўрт йил ичида 10 нафар қизнинг ўлдирилиши маҳаллий ҳуқуқ-тартибот идораларини ташвишга солган. Мурдаларнинг ҳаммаси бўғиб ўлдирилган ва уларни зўрлаш аломатлари бўлган. Терговчилар ушбу жиноятларни серияли қотил амалга ошираётганини яхши тушунарди.
Қидирув-суриштирув ишларида 2 миллиондан зиёд полициячи иштирок этган ва бу Жанубий Корея тарихидаги рекорд рақамлардан бири эди. 21 мингга яқин гумонланувчи сўроқ қилинган, 40 минг кишидан бармоқ излари намуналари олинган. Якунда 1989 йили полиция Юн исмли 22 ёшли йигитни ҳибсга олади. Орадан маълум вақт ўтгач гумонланувчи айбига иқрорлигини тан олган.
Юн 8-қурбон, 14 ёшли қизни зўрлаганини тан олган. Жиноятчига умрбод қамоқ жазоси берилган. Жиноят иши ёпилган эди, аммо Юн қамоқхонада терговчиларнинг унга зўравонлик билан айблов эълон қилгани ва уни қилмаган ишларини тан олишга мажбурлашганини айтган. Ўз берган кўрсатмаларни инкор қилган.
Юн 20 йил давомида қамоқхонада бўлди. У 2009 йилда шартли равишда муддатидан аввал озодликка чиққан. 2020 йил ёзида Хвасон полиция бошқармаси бошлиғи Пе ён Чжу илк бора 30 йил аввал полициянинг Юнга нисбатан куч ишлатиб, уни қотилликларни тан олишга мажбурлаганини тан олди. Айни вақтда иш қайта кўриб чиқилмоқда ва Юннинг адвокатлари унга қўйилган айбловларни бекор қилиш учун курашмоқда.
Ҳақиқий қотил Ли Чун Чже бўлиб чиқди. У ўз айбига иқрорлигини билдирди. Ли 2019 йилнинг кузида айбига иқрорлигини айтди, ўшанда полиция 57 ёшли эркакнинг гумонланувчилардан бири эканини маълум қилган. ДНК текширувининг қайта таҳлилидан кейин терговчилар Лининг 10 нафар қурбоннинг камида уч нафарини ўлдирган бўлиши мумкинлигини тахмин қилди. Аслида эса Ли қизларнинг ҳаммасини, Юн зўрлагани айтилган ва айбсиз айбдор сифатида 20 йил «ўтириб» чиққан 8-қурбонни ҳам ўлдирган.
2020 йил 2 ноябрда бўлиб ўтган Юн иши бўйича такрорий эшитувда Ли қотилликларнинг айбдори эканини тан олди. Шу тариқа унинг 1986–1991 йилларда қилган умумий жиноятларига 4 та қотиллик ва 30 та зўрлаш жинояти киритилди.
«Ҳанузгача ўша вақтда нима учун гумонланувчилар орасида бўлмаганимни тушунмайман. Атрофимда жиноятлар бўлар, мен уларни яширишга деярли уринмас эдим. Мени жуда тез ва осон ушлашади деб ўйлардим. Ахир ўшанда шаҳарда минглаб полициячилар юрарди. Кўпинча детективларга дуч келар ва улар мендан атрофимда содир бўлган нарсалар ҳақида сўрашарди», — деган Ли.
Лини 80 йилларда содир бўлган қотилликлар учун жавобгарликка тортиб бўлмайди — уларнинг кўриб чиқилиш муддати ўтиб бўлган. Бироқ Ли 1994 йилдан буён қамоқхонада қолмоқда ва умрининг охиригача озодликдан маҳрум қилинган. 26 йил аввал у ўз рафиқасини зўрлаш ва ўлдиришда айбланиб, умрбод қамоқ жазосига ҳукм қилинган.
Ли суд залида қилган ҳаракатларидан пушаймонлигини айтиб, узр сўраган.
«Мен бу ерга келиб қилмишларим тафсилотларини айтиб, қурбонларнинг оила аъзоларидан кечирим сўраяпман, уларнинг асл ҳақиқатни билишларини истадим. Умримнинг қолган қисмини виждон азобида ўтказаман», — деган Ли.
Судда нима учун ушбу қотилликларни қилгани юзасидан берилган саволга у ҳанузгача бунинг аниқ сабабини топмаганини айтиб, жавоб қилди.
Қотил эшитувда иштирок этган, ноҳақ айбланган ва 20 йил муддатни ўтаган Юндан кечирим сўраган. Юн эса содир бўлган воқеаларни идрок қилиши учун муайян вақт керак экани, ўз ор-номусини тиклаб, ҳаётининг қолган қисмини айбсиз одамдек ўтказишни исташини таъкидлаган.
Изоҳ (0)