Самарқандлик тадбиркор Шерзод Бурҳонов Олий суд раисининг собиқ ўринбосари Баҳодир Деҳқонов уни чув туширганини айтмоқда (видео, 3-қисм)

«Дарё»да Олий суд раисининг собиқ ўринбосари Баҳодир Деҳқоновнинг кўрсатмаси билан қамалган самарқандлик тадбиркор Президентдан нажот кутаётганлиги тўғрисида мақола эълон қилинганди.

2017 йил февраль ойида Жиноят кодексининг 165-моддаси 2-қисми «а, в», 168-моддаси 3-қисми «а» банди, 184-моддаси 3-қисми, 189-моддаси, 28, 211-моддаси 3-қисми «а» банди ва 243-моддасида назарда тутилган жиноятларни содир этганликда айбли деб топилган Шерзод Бурҳоновга 12 йил 6 ой муддатга озодликдан маҳрум қилиш жазоси тайинланган.

Мазкур масала юзасидан журналистик суриштирув олиб бораётган «Дарё» мухбири Фарҳод Норбўтаев самарқандлик тадбиркор, маҳкум Шерзод Бурҳонов билан суҳбат уюштирди.

— Биласизми, суд қандай ўтди, худди театрдек. Бўйнимга ноҳақ айбловларни қўйишди. Судья «сен қамаласан, мол-мулкинг мусодара бўлади» деди. Бировларнинг мол-мулки мусодара бўлди. Мен ҳатто судьяга бировларнинг мол-мулки, яъни 6 та автомобиль, «Алмаз золотой дворец» ресторанини қайтариб беринг, менга тегишли бўлган «Алмаз Мастура Алмос» бахмал ишлаб чиқариш цехини мусодара қилинг деб айтдим. Аммо судья буни рад этди, — дейди Шерзод Бурҳонов. – Кейинчалик буюртмачиларнинг мақсади «Алмаз золотой» ресторанига қаратилганлигини билдим. Уларнинг нияти ресторанга эгалик қилиш эди. Булар ҳатто кейинчалик ресторан сотувга қўйилганидан кейин ҳам сотиб оламан деб югуришди. Лекин орада бошқалар сотиб олиб кетди.

Шерзод Бурҳонов қамалганидан сўнг 350 киши ишлаб келган «Алмаз Мастура Алмос» бахмал цехининг фаолияти ҳам тўхтаган. Натижада корхонада фаолият юритувчи ишчилар тирикчилик учун чет элга ишлагани кетиб қолган.

— Мени 12,5 йилга қамаш дастлабки режа бўлган. Уларнинг асл мақсади кейинчалик мени қамоқхонада узоқ муддатга қолдириш эди, — дейди Шерзод Бурҳонов. — Президентимизнинг беш кишига иш берган тадбиркор менинг ҳимоямда деган гапларини эшитиб жуда хурсанд бўлганман. Насиб қилса чиқиб олсам, албатта, корхоналарни ишлатиб, ресторанларимни қайтариб олиб, келгусида астойдил меҳнат қиламан.

2012 йилнинг 20 июль куни Самарқанд шаҳридаги 11-сон давлат нотариал идорасининг нотариуси Мубин Жўраев томонидан тасдиқланган 82/100 қисм уй-жой олди-сотди шартномасида «Алмаз золотой дворец» ресторани қурилган жой — Абдураҳмон Жомий кўчаси, 29-уй Бурҳон Сирожевдан сотиб олинганлиги кўрсатилган. Ҳатто шартноманинг 3-бандида кадастр хизмат маълумотномасига мувофиқ, сотилаётган 82/100 қисм уй-жойнинг инвентаризацион нархи 34, 551 820 сўмни ташкил қилиб, тарафлар томонидан 100 миллион сўмга баҳолангани ва сотувчи ушбу пулни сотиб олувчидан шартномани имзолаш арафасида тўлиқ олганлиги билдирилган.

Аммо Бахтиёр Сирожев отасининг номига расмийлаштирилган Абдураҳмон Жомий кўчаси, 29-уйнинг пулини олинмаган деб мурожаат қилган. Шунингдек, унинг ёнида 11 нафар фуқаро яшайдиган 27-«А» уй ҳам сотиб олинган. Бироқ уларнинг бирортаси пулни олганим йўқ деб мурожаат қилмаган. Биргина Бахтиёр Сирожевнинг асоссиз мурожаати сабаб 27-«А» уй ҳам мусодара бўлиб кетган. Жиноят ишлари бўйича Самарқанд шаҳар суд судьяси Баҳодир Алиқулов эса ушбу нотариал қоғозларни инобатга олмаган.

—Душманларим яқинларим бўлиб чиқишди. Натижада бировларнинг мол-мулклари мусодара қилинди. Улар ҳалигача ўзининг мулкини сўраб келишади, — дейди Шерзод Бурҳонов. — Бировларга ўхшаб маблағларни чет элга чиқарганим йўқ. Ҳатто кредит ҳам олмаганман. Солиқларни ўз вақтида тўлаб келганман. Аммо барибир бўйнимга 1 миллиард 600 миллион сўм қарз қўйилди. Унинг ўрнига 6 та автомашина ва 4,5 миллиард сўмга баҳоланган «Алмаз золотой дворец» ресторани мусодара бўлиб кетди.

Шерзод Бурҳоновнинг таъкидлашича, суд жараёнида аудиторнинг текширув хулосалари хронометраж қилиниб, судья Баҳодир Алиқуловга тушунтирилганига қарамасдан суд буни инобатга олмаган. Суд жараёнида корхонада тафтиш ўтказган Самарқанд вилоят Давлат солиқ бошқармаси ходими аудиторнинг саволларига жавоб беролмаган.

— Менга қўйилган 243-моддани қамоққа кирганимдан сўнг билдим. Бу «Жиноий фаолиятдан олинган даромадларни легаллаштириш» моддаси экан. Уни кимга қўяди? Бу модда ноқонуний пул ишлаган бўлса қўйилади. 184-модда («Солиқлар ёки бошқа мажбурий тўловларни тўлашдан бўйин товлаш») ва 189-модда («Савдо ёки хизмат кўрсатиш қоидаларини бузиш») ҳам асоссиз қўйилган. Ахир мен мансабдор шахс эмасман-ку? Мен завод ва фабрика ишлатаман, — дейди Шерзод Бурҳонов. — Улар ўша пайт бахмал цехини олиши керак эди. Аммо у буларга маъқул бўлмаган. Улар каттароқ нарсани мўлжаллаган. Қолаверса, биринчи марта кўряпман, ишлаганига 2 ой бўлган корхонага 138 миллион сўм қарз қўйилганини. Улар шунақа туҳматлар билан қамаб қўйишди.Шерзод Бурҳонов Президент Шавкат Мирзиёевдан ўзига қўйилган айбловларни қайтадан кўриб чиқишда ёрдам сўрамоқда. Унинг айбсизлиги, собиқ судья Баҳодир Деҳқонов ва МХХнинг собиқ биринчи ўринбосари Шуҳрат Ғуломов, уларнинг топшириғини бажарган судья Баҳодир Алиқулов ҳамда терговни буюртма асосида олиб борган катта лейтинант Санъат Одиловнинг ноқонуний хатти-ҳаракатлари кўриб чиқилишини истамоқда.

— Мақсадим битта, халқимизда тадбиркор кўпайсин. Одамларимиз шу ерда ишласин, четга чиқмасин. Ўзбекистонни дунёга танитиб, чет элга маҳсулотларини экспорт қилсин, — дейди Шерзод Бурҳонов.

Шерзод Бурҳонов Олий суд томонидан «Дарё» нашри орқали берилган муносабатга ҳам ўз қарашини билдириб ўтди.

– Мен Олий суднинг муносабатини ўқидим. У ерда олий маълумотли, Президент ишонч билдирган шахслар ишлайди. Аммо тўғриси, жуда кулгили жавоб бўлган. Мақолада аниқ савол қўйилган. Нима учун бировнинг мулки бўлган «Алмаз золотой дворец» ресторани, 6 та автомашина ноқонуний тарзда мусодара бўлди? Қолаверса, нега 12,5 йил муддатга қамалиши сўралган? — дейди Шерзод Бурҳонов. — Аммо уларнинг жавобида «адвокат Озода Мухторованинг мурожаати юзасидан бизлар бир йил муддатини камайтирдик» дейилган. Жиноят Кодексининг 168-моддасида («Фирибгарлик») агар етказилган моддий зарарнинг ўрни қопланган тақдирда озодликни чеклаш ва озодликдан маҳрум қилиш тариқасидаги жазо қўлланилмайди деб белгилаб қўйилган. Менга бу модда билан 2 йил ҳукм ўқилиб, кейинчалик бир йилини олиб ташлаяпти. Биз ҳақиқат учун мурожаат қиляпмиз, бир йил муддатни олиш учун эмас.

Шерзод Бурҳонов бинолар ва мол-мулклар мусодара қилинишидан тушган пуллар қаерга кетган деган саволни ҳам ўртага ташлаган. Бу пуллар аниқ давлат ҳисобига бориб тушганми ёки йўқми? Қолаверса, на тергов ва на суд давомида 1 миллиард 600 миллион сўмлик камомад нима мақсадда қўйилганлигига аниқлик киритилмаган.

— Менга 243-модда («Жиноий фаолиятдан олинган даромадларни легаллаштириш») бўйича айблов қўйилди. «Алмаз золотой дворец» ресторани 4,5 миллиард сўмга баҳоланди. Ундан ташқари, 6 та автомобиль ҳам мусодара қилинди. Умумий ҳисобда 5,5 миллиард сўмлик мол-мулк мусодара қилинди. Менга исботлаб беришлари керак қанча пулни яширганимни, — дейди Шерзод Бурҳонов. — Ҳали булар 1,6 миллиард сўмни исботлаб бермасдан мусодара пуллари давлатга ўтказиб юборилсин деяпти. Мен тадбиркорман. Халқимизга иш беряпман. Ўзингиз ўйланг, 300 нафар фуқаро қўлингизда ишласа биттадан боласи бўлса 600 киши, иккитадан бўлса 900 киши бўлади. 900 кишини димоғи чоғ, қозони қайнайди, вақтида ойлигини олади.

Шерзод Бурҳоновнинг таъкидлашича, суд жараёнида Самарқанд шаҳар ИИБнинг собиқ биринчи ўринбосари судга келиб уни танимаслигини билдирган. Тергов жараёнида тадбиркорга Жиноят кодексининг 211-моддаси («Пора бериш») тўғридан тўғри қўйилган. Аммо суд ҳукм ўқиётганда 28-моддаси («Жиноят иштирокчиларининг турлари») орқали 211-модда қўйилган ва 4 йил муддатга қамоқ жазоси тайинланган.

– Мен адвокатимдан 28-модда орқали айблов қўйиш нима деб сўраганимда, бу пора бераман деб ўйлаган, хаёл қилган деб тушунтирди. Хаёл қилганимга 4 йил олсам, бу жуда кулгили эмасми? 45 минг доллар пора бераман, деб ўй сурган эканман. Нима, булар фолбин бўлганми?

Масаланинг яна бир қизиқ томони шундаки, Шерзод Бурҳонов қамалганидан сўнг Олий суд раисининг собиқ ўринбосари Баҳодир Деҳқонов назорат тартибида ёзган шикоятидан сўнг унинг молк-мулкларини савдога қўйишни тўхтатган.

—Мурожаатимиз Баҳодир Деҳқоновга бориб тушяпти. У Олий суд номидан кимошди савдосида қўйилган нарсаларни тўхтатиш бўйича хат юборяпти. Мен бу хатни кўриб, очиғи, қувондим. Аммо бир ой давомида биз 1,6 миллиард сўмни тўлашимиз керак эди. Шунда қарзларни тўлаш учун адвокатга 250 минг доллар бердик. Пул тўланиши билан савдодан тўхтатилган нарсалар яна ўз кучида қолиб, савдога чиқарилди, — дейди Шерзод Бурҳонов. — Мен 1,6 миллиард сўмни тўлаяпман, сотувдан тўхтатилиб қарзлар қопланганидан сўнг яна мол-мулклар кимошди савдосига чиқариб юборилмоқда. Турмуш ўртоғим келиб вазиятни тушунтирганидан сўнг пулни қайтариб олинглар, деб айтдим. Менга ўша пулдан 90 минг доллар қайтариб бериляпти. Қолган 160 минг доллар пул уларда қолиб кетган. Бу ерда ҳам Баҳодир Деҳқоновнинг қўли бор деб ўйлаяпман. Негаки айнан Деҳқонов савдодан тўхтатиш хатини юборганди. У мени ҳам қамаб, ҳам мол-мулкимни савдодан олиб қоламан деб икки томонлама иш қилди.

Шерзод Бурҳонов ишни қайта кўриб чиқиш мақсадида 4 маротаба Олий судга мурожаат қилган. Тўрт маротаба ҳам «ҳукм ўз кучига қолди» деган жавоб келган. Охирги хат ёзилганида Баҳодир Деҳқонов қамалган.

— Мени 12 йил 6 ойга ноҳақ қамашди. Барча ишни қайтадан кўриб чиқишларини, айбим бўлса тўлиқ исботлаб беришларини истайман. 3 йил умрим ўтиб кетди. Одилона суд кўриб чиқиб, адолатли ҳукм чиқариш тарафдориман. Асоссиз қамоқда ўтириш жуда ҳам алам қилар экан. Одам агар шу ишни қилган бўлса мен шуни қилдим-ку, шунинг учун ўтирибман дейди. Аммо менда бу нарса йўқ. Ҳаммаси асоссиз. Бирорта айбим исботлангани йўқ. «Дарё»га мурожаат қилишим ҳам бежиз эмас, чунки сизлар шикоятимга эътиборсиз бўлмадингиз, масалани моҳиятига етишга ҳаракат қиляпсиз, — дейди Шерзод Бурҳонов.