Польшада яшовчи Томаш Коменда 18 йил озодликдан маҳрум қилинган эди. Яқинда унинг айбсизлиги маълум бўлди ва унга деярли 13 миллион злотий (3,5 миллион доллар) тўлаб берилди, дея хабар қилмоқда «РИА Новости».
Ўн саккиз йил олдин Польшанинг кичик бир шаҳрида 15 ёшли қиз вафот этган. У зўрлангани ва совуқда қолдирилгани аниқланган. Ушбу жиноят учун 23 ёшли Коменда айбдор деб топилган. У 25 йилга озодликдан маҳрум этилган.
Яқинда ушбу жиноят ишида маҳкумнинг айбсизлигини исботловчи экспертиза натижалари пайдо бўлди. Натижада Томаш Коменда қотиллик ва зўрлашда айбсиз деб топилди ва 18 йиллик қамоқдан сўнг жазони ўташдан озод қилинди.
Озодликка чиққандан кейин Коменда давлатдан суд орқали товон пули талаб қилишга қарор қилди. Унга 18 миллион — қамоқда ўтказган ҳар йили учун бир миллион злотий (тахминан, 4,8 миллион доллар) товон пули тўлаш белгиланди.
RMF FM порталининг хабар беришича, Ополе вилоят суди 8 февраль, душанба куни Комендага 12 811 533 злотий компенсация ва товон пули тўлашга қарор қилган. Суд мажлиси ёпиқ эшиклар ортида бўлиб ўтган.
Айни пайтда ҳуқуқни муҳофаза қилувчи идоралар қизнинг ўлимининг ҳақиқий айбдорларини топишга муваффақ бўлган. Уларнинг ҳар бири 25 йилга озодликдан маҳрум қилинган.
Бундан аввал Бухорода ИИБ ходимларининг хатоси билан 11 йил умрини қамоқда ўтказган 53 ёшли фуқаро айбсиз деб топилгани, Жанубий Кореяда 57 ёшли эркак 80-йилларда қилган қотилликларини тан олиб, ушбу жиноятлар учун ноҳақ айбланиб, қамалган маҳбусдан кечирим сўрагани ҳамда ўқитувчиларни мажбурий меҳнатга жалб қилгани учун жаримага тортилган Зангиота ҳокими ўринбосари мазкур масала бўйича судда ютиб чиққани ҳақида хабар берилганди.
Изоҳ (0)