Қозоғистон Ички ишлар вазирлиги томонидан ўтказилган “Мигрант” тезкор-профилактик тадбири натижаларига кўра, 1240 нафар ноқонуний мигрант мамлакатдан чиқариб юборилди. Бу ҳақда Polisia.kz хабар берди.
Тадбир давомида мамлакатда умумий 10 мингга яқин миграция қонунчилигини бузганлар аниқланди. Хусусан, яшаш муддати ўтган 4,5 минг нафар чет эл фуқароси, ноқонуний меҳнат фаолиятини амалга оширган 2,5 минг нафар чет эл фуқароси, шунингдек, 60 нафар ноқонуний такси ҳайдовчиси аниқланган.
Чет эллик фуқароларнинг келганлиги ҳақида полицияга хабар бермаганлиги учун 2200 нафар шахс 4 минг доллардан ортиқ миқдорда маъмурий жаримага тортилди. Шунингдек, чет элликларни ноқонуний ишга ёллагани учун 500 нафар иш берувчи ҳам 65 минг доллари миқдорида жаримага тортилди. Айбланувчилар орасида илгари ҳам чет эллик ишчиларни жалб қилиш қоидаларини бузган беш нафар шахс аниқланди. Уларга нисбатан Жиноят кодексининг 395-моддаси — “Қозоғистон Республикасида хорижий ишчи кучини жалб этиш ва ундан фойдаланиш қоидаларини бир неча бор бузиш” бўйича тергов ишлари бошланди.
Бундан ташқари, чет эллик шахсларнинг ноқонуний яшашини қонунийлаштириш билан шуғулланган Қозоғистон фуқароларига нисбатан “Ноқонуний миграцияни ташкил этиш” моддаси бўйича 12 та жиноий иш қўзғатилди. Жумладан, пойтахтдаги университетлардан бирининг ётоқхона коменданти 56 нафар меҳнат мигрантига пул эвазига талаба сифатида вақтинча яшаш учун рухсатнома расмийлаштириб бергани аниқланди.
Изоҳ (0)