Россия Ички ишлар вазирлиги меҳнат мигрантлари учун электрон патентларни жорий этиш режаларини эълон қилди

Россия меҳнат муҳожирлари учун электрон патентни жорий қилиши мумкин. Бу ҳақда Россия Ички ишлар вазирлигининг матбуот хизматига таяниб «РБК» хабар берди. Патент электрон маълумот ташувчи карта кўринишида бўлади.

Вазирлик вакилининг сўзларига кўра, ИИВ бунинг учун керакли меъёрий асосларни тайёрламоқда. Меҳнат муҳожирларига ишлаш учун электрон патент бериладиган биринчи шаҳар Москва бўлади.

«Ички ишлар вазирлигининг юқоридаги норматив-ҳуқуқий ҳужжатларини эълон қилиб, кейинчалик Ички ишлар вазирлиги ва Москва ҳукумати ўртасида тегишли шартнома имзоланганидан кейин пойтахт ҳудудида электрон патентни жорий қилиш мумкин бўлади», — деб қўшимча қилди матбуот хизмати.

Шунингдек, вазирликнинг таъкидлашича, пойтахтда патент жорий қилиш учун харажатлар федерал бюджет маблағлари ҳисобидан қопланмайди.

Февраль ойида ҳукумат Россияда уч ойдан кўпроқ муддат визасиз бўлиш ҳуқуқига эга бўлган мамлакатлардан келган барча мигрантлар учун биометрик ва тиббий назоратдан ўтиш мажбуриятини жорий этишни таклиф қилди. Гап Россияга ишлаш учун келадиган Евросиё иқтисодий иттифоқи давлатларининг фуқаролари ҳақида кетмоқда.

Мигрантларнинг соғлиғи устидан тўлиқ назорат қилинмагани сабабли хавфли юқумли касалликларни олиб кириш хавфи ортади, деб таъкидлади қонун лойиҳаси муаллифлари. Бундан ташқари, биометрик маълумотлар ҳуқуқни муҳофаза қилиш идораларига жиноятчиларни, террорчиларни ва Россияда бўлиши мумкин бўлмаган шахсларни қидиришда ёрдам беради, деб қўшимча қилди улар. Ушбу қонун лойиҳаси кўриб чиқиш учун Давлат думасига юборилди.

Шунингдек, ИИВ меҳнат муҳожирлари учун электрон рўйхатдан ўтиш тизими жорий қилинишини маълум қилди. Электрон рўйхатдан ўтиш уларнинг ишга жойлашиши учун асосий шарт бўлади. Шу билан бирга, чет элликларни иш билан таъминловчилар ҳам махсус реестрда рўйхатдан ўтиши керак бўлади.

Аввалроқ Россия Ички ишлар вазирлиги МДҲ давлатларидан келиб, Россияда ноқонуний равишда юрган муҳожирларни 15 июнга қадар мамлакатни тарк этишларини талаб қилди.

Ички ишлар вазирлигининг статистик маълумотларига кўра, бугунги кунда Россияда 332 мингдан зиёд Ўзбекистон фуқароси, 247 минг Тожикистон фуқароси, 152 минг Украина фуқароси, 120 минг Озарбайжон фуқароси, 115 минг Қирғизистон фуқароси, 61 минг Арманистон фуқароси, 56 минг Молдова фуқароси, 49 минг Қозоғистон фуқароси ноқонуний мигрант ҳисобланади.

Кейинроқ Ички ишлар вазирлиги ноқонуний муҳожирларга мамлакатда вақтинча бўлиш муддатини узайтириш учун вазирлик органларига мурожаат қилишини қатъий тавсия қилди. Вазирлик мурожаатида муҳожирларга чеклов чоралари қўлланилмаслиги таъкидланди.

Шунингдек, Россияда йирик лойиҳаларни амалга ошириш учун меҳнат муҳожирлари етишмаётгани, Москвага ишлаш учун борган 500 дан ортиқ ўзбекистонлик 2 ойдан буён карантиндалиги сабаб норозилик билдиргани тўғрисида хабар берилганди.