Путин: Россия ҳукумати мамлакатни муҳожирлар учун қулай қилишга интилмоқда

Россия ҳукумати бошқа мамлакатлардан келган меҳнат муҳожирларининг ҳаётини енгиллаштириш учун бор кучини ишга солмоқда. Бу ҳақда Россия президенти Владимир Путин 8 май куни Тожикистон президенти Эмомали Раҳмон билан учрашувда айтиб ўтди, деб ёзади «РБК».

«Одамлар ўзларини қулай ҳис қилиши учун биз барча нарсани қиляпмиз, устига-устак бизда ҳозир иқтисодиётнинг бутун бошли тармоқларида ҳақиқий ишчи қўллар танқислиги бор», — деди Путин.

Айни вақтда президент муҳожирлар масаласини Тожикистон учун «нозик» деб атаб, Россияда ишлаётган ушбу мамлакат фуқаролари ўз оилаларига «анча катта миқдорда пул» юборишини таъкидлади.

«Бу мутлақо ижобий жараён деб ҳисоблайман», — деди Путин.

Аввалроқ Россия президенти матбуот котиби Дмитрий Песков Россияда COVID-19 пандемияси туфайли сезиларли даражада камайган меҳнат муҳожирларининг сони мамлакатдаги йирик лойиҳаларни амалга ошириш учун етарли эмаслигини айтган эди.

Аммо кейинроқ Россия ички ишлар вазири ўринбосари Александр Горовой Россияда бир миллиондан ортиқ одам ноқонуний бўлиб турганини маълум қилди. Вазир ўринбосари келтирган Ички ишлар вазирлигининг статистик маълумотларига кўра, бугунги кунда Россияда 332 мингдан зиёд Ўзбекистон фуқароси, 247 минг Тожикистон фуқароси, 152 минг Украина фуқароси, 120 минг Озарбайжон фуқароси, 115 минг Қирғизистон фуқароси, 61 минг Арманистон фуқароси, 56 минг Молдова фуқароси, 49 минг Қозоғистон фуқароси ноқонуний мигрант ҳисобланади.

Россия Ички ишлар вазирлиги МДҲ давлатларидан келиб, Россияда ноқонуний равишда юрган муҳожирларни 15 июнга қадар мамлакатни тарк этишларини талаб қилмоқда.