2025 йил 13—14 март кунлари Тошкент амалий фанлар университетида “Ижтимоий-гуманитар фанларнинг долзарб масалалари ва замонавий ёндашув” мавзусида халқаро илмий-амалий конференция бўлиб ўтди. Тадбирда ижтимоий-гуманитар фанлар соҳасидаги етакчи олимлар, мутахассислар ва амалиётчилар иштирок этиб, илмий тадқиқотларнинг долзарб муаммолари ва уларнинг ечимларини муҳокама қилдилар.
Конференция доирасида тилшунослик, адабиётшунослик, тарих, ижтимоий фанлар ва маданияцҳунослик соҳаларидаги илмий ютуқлар, инновацион ғоялар ва халқаро ҳамкорлик масалалари муҳокама қилинди.
Тадбирда Малайзия, Германия, Латвия, Туркия, Индонезия, Ҳиндистон, Озарбайжон, Қозоғистон, Қирғизистон, Тожикистон, Миср ва бошқа давлатлардан таниқли олимлар, экспертлар ва олий таълим муассасалари вакиллари иштирок этдилар.
Тошкент амалий фанлар университети халқаро илмий ҳамкорликни кенгайтиришга алоҳида эътибор қаратади. Бизнинг мақсадимиз – илмий-тадқиқот соҳасида халқаро алоқаларни мустаҳкамлаш ва илмий муҳитни янада ривожлантиришдир. Шу боис, университетимиз хорижий олий таълим муассасалари ва тадқиқот марказлари билан фаол ҳамкорлик олиб бормоқда, дея таъкидлади университет ректори Абдусалом Умаров.
Шу ташаббуслар доирасида 10 мартдан 24 мартгача Тошкент амалий фанлар университетида Малайзиянинг Университи Пендидикан Султан Идрис (УПСИ) университети профессорлари ташриф буюришган.
УПСИ – Малайзиянинг етакчи педагогика университетларидан бири бўлиб, таълим ва илмий тадқиқотлар соҳасида юқори малакали мутахассисларни тайёрлаши билан танилган.
Ташриф давомида малайзиялик профессорлар талабалар ва ўқитувчилар учун маҳорат дарслари, семинарлар ва илмий муҳокамалар ташкил этмоқдалар. Бу орқали улар ўз тажрибалари ва инновацион ёндашувлари билан ўртоқлашиб, халқаро академик ҳамкорлик имкониятларини янада кенгайтиришга ҳисса қўшадилар.
Мазкур ташриф Ўзбекистон ва Малайзия ўртасидаги таълим ва илм-фан соҳасидаги ҳамкорликни мустаҳкамлаш учун муҳим қадамлардан бири бўлди.
Реклама ҳуқуқи асосида.
Изоҳ (0)