Қозоғистоннинг миграция қонунчилигини бузган 18 нафар Ўзбекистон фуқароси Олмаота полицияси томонидан мамлакатдан чиқариб юборилди. Бу ҳақда “Polisia.kz” хабар берди.
Олмаота полицияси томонидан олиб борилган тезкор-профилактик тадбирлар давомида 18 нафар Ўзбекистон ва Тожикистон фуқароси аниқланди.
“18 нафар ҳуқуқбузарни давлат чегарасигача олиб боришни ташкил этдик. Ушбу мақсадлар учун кўп ўринли автобус тақдим этилди. Улар давлат чегарасининг Жибек жўли (Черняевка) назорат-ўтказиш пунктигача кузатиб борилди”, — дейди миграция бошқармаси бошлиғи Асхат Бутунчинов.
Шунингдек, у Олмаота полицияси ноқонуний миграция каналларини, чет элликларни ноқонуний ёллаш фактларини аниқлаш мақсадида доимий равишда “Мигрант”, “Ноқонуний” ва “Қонун ва тартиб” бўйича иш олиб боришини айтди.
Маълумот ўрнида, Ўзбекистон қўшни Қозоғистон Республикасини ишчи кучи билан таъминлаш борасида бешинчи ўринда туради. Қозоғистонга ишлаш учун асосан Хитой, Ҳиндистон, Туркия, Буюк Британия ва Ўзбекистондан чет элликлар келади. Ҳозир республикада 1640 нафар иш берувчи хорижлик мигрантлар хизматидан фойдаланмоқда. Қайд этиш жоизки, ходимларнинг 96 фоизи Қозоғистон республикаси фуқароларидир.
Изоҳ (0)