Ўзбекистон Бош консулхонаси ходимлари саъй-ҳаракатлари билан Қозоғистонга муолажа олиш мақсадида борган уч нафар ўзбекистонлик фуқаронинг шахсини тасдиқловчи ҳужжатлари олиб берилди. Бу ҳақда “Дунё” ахборот агентлиги хабар берди.
Ўзбекистонлик бўлган Ф.Р. ва Ф.А. ва С.М. маҳаллий ички ишлар ходимлари томонидан паспортлари ноқонуний тарзда олиб қўйилгани бўйича мурожаат қилган. Ўрганишлар давомида шу йил 28 январь куни маҳаллий полиция ходимлари ҳамюртларимиз турган меҳмонхонага келиб, уларнинг паспортларини олиб қўйгани ва Қозоғистондан чиқариб юбориш билан таҳдид қилгани маълум бўлди.
Олмаота вилояти Ички ишлар бошқармаси мутасаддилари билан олиб борилган музокаралар натижасида полиция ходимларининг хатти-ҳаракатлари ва талаби ноқонуний бўлгани ўз тасдиғини топди. Чунки 2000 йил 7 июлдаги Ўзбекистон ва Қозоғистон ўртасидаги фуқароларнинг ўзаро саёҳатлари тўғрисидаги шартномага мувофиқ Ўзбекистон фуқаролари Қозоғистон ҳудудида бир ой муддатгача регистрациясиз бўлиши мумкин.
Ушбу талабдан келиб чиқиб, юқорида келтирилган фуқаролар Қозоғистон қонунчилигини бузмаган. Шу боис ҳеч қандай маъмурий жавобгарликсиз уларнинг шахсини тасдиқловчи ҳужжатларининг қайтарилиши таъминланди.
Бундан аввал АҚШда Ўзбекистон фуқароси ҳибсга олингани ҳақида хабар берилганди. Шунингдек, Россиянинг Санкт Петербург шаҳри Киров туманида ўзбекистонлик эркак 15 килограм гашиш билан қўлга олинганди.
Бундан ташқари, Россиядан 45 нафар ўзбекистонлик мигрант чиқариб юборилиши ҳам айтилганди.
Изоҳ (0)