Лондон полицияси Вестминстер саройининг Биг Бен номи билан машҳур Елизавета минорасига чиққан эркакни қўлга олди. У 16 соат давомида минора устида қолиб, Фаластин байроғини ушлаб турган. Бу ҳақда Independent хабар берди.
Фавқулодда хизматлар 8 март куни эрталаб минорадаги одам ҳақида хабар олган. Аниқланишича, у сарой томигача кўтарилган. Шу вақт давомида Биг Бен ёнида тўпланган бир гуруҳ одамлар “Фаластинга озодлик!” деб ҳайқирган.
Соат 10:00 да минора ёнига нарвонли ўт ўчириш машинаси келган. Фавқулодда вазиятлар ходимлари мегафон орқали фаол билан музокаралар олиб бориб, уни пастга тушишга ундаган. Бироқ эркак фақат “ўз шартлари асосида” тушишини билдирган”. Қутқарувчилар яқинлашганида эса, у яна юқорига чиқишини айтиб таҳдид қилган.
Музокаралар кун бўйи давом этган ва фақат 9 март куни эркакни ўт ўчириш крани ёрдамида туширишгандагина якунланган. У минора устида жами 16 соат қолган. Эркак ерга тушиши биланоқ ҳибсга олинган.
Ҳодиса сабаб Вестминстер кўприги бутунлай ёпилган, фавқулодда хизматлар жойида ишлаган. Парламент бўйлаб экскурсиялар ҳам бекор қилинган.
Биз Лондон ўт ўчириш бригадаси билан ҳамкорликда ишладик ва воқеани имкон қадар тезроқ якунлаш, ҳаёт учун хавфни камайтириш мақсадида мутахассисларни жалб қилдик. Парламент мажмуаси маъмурияти билан яқин алоқада бўлдик ва барча йўллар қайта очилди, дейилади Вестминстер полицияси баёнотида.
Хавфсизлик бўйича саволлар туғилди
Консерватив депутат Бен Обисе-Жекти эркак қандай қилиб парламент ҳудудига киргани борасида тушунтириш берилиши кераклигини айтди.
Мен ҳар куни парламент атрофида патруллик қилаётган ўнлаб қуролланган полициячиларни кўраман. Бугун улар қаерда эди? Душанба куни депутатлар ва ходимлар учун бу намойишчи қандай қилиб қўриқчиларни осонгина четлаб ўтгани ҳақида тўлиқ ҳисобот талаб қиламиз, деб ёзди у Х саҳифасида.
Изоҳ (0)