London politsiyasi Vestminster saroyining Big Ben nomi bilan mashhur Yelizaveta minorasiga chiqqan erkakni qo‘lga oldi. U 16 soat davomida minora ustida qolib, Falastin bayrog‘ini ushlab turgan. Bu haqda Independent xabar berdi.
Favqulodda xizmatlar 8-mart kuni ertalab minoradagi odam haqida xabar olgan. Aniqlanishicha, u saroy tomigacha ko‘tarilgan. Shu vaqt davomida Big Ben yonida to‘plangan bir guruh odamlar “Falastinga ozodlik!” deb hayqirgan.
Soat 10:00 da minora yoniga narvonli o‘t o‘chirish mashinasi kelgan. Favqulodda vaziyatlar xodimlari megafon orqali faol bilan muzokaralar olib borib, uni pastga tushishga undagan. Biroq erkak faqat “o‘z shartlari asosida” tushishini bildirgan”. Qutqaruvchilar yaqinlashganida esa, u yana yuqoriga chiqishini aytib tahdid qilgan.
Muzokaralar kun bo‘yi davom etgan va faqat 9-mart kuni erkakni o‘t o‘chirish krani yordamida tushirishgandagina yakunlangan. U minora ustida jami 16 soat qolgan. Erkak yerga tushishi bilanoq hibsga olingan.
Hodisa sabab Vestminster ko‘prigi butunlay yopilgan, favqulodda xizmatlar joyida ishlagan. Parlament bo‘ylab ekskursiyalar ham bekor qilingan.
Biz London o‘t o‘chirish brigadasi bilan hamkorlikda ishladik va voqeani imkon qadar tezroq yakunlash, hayot uchun xavfni kamaytirish maqsadida mutaxassislarni jalb qildik. Parlament majmuasi ma’muriyati bilan yaqin aloqada bo‘ldik va barcha yo‘llar qayta ochildi, deyiladi Vestminster politsiyasi bayonotida.
Xavfsizlik bo‘yicha savollar tug‘ildi
Konservativ deputat Ben Obise-Jekti erkak qanday qilib parlament hududiga kirgani borasida tushuntirish berilishi kerakligini aytdi.
Men har kuni parlament atrofida patrullik qilayotgan o‘nlab qurollangan politsiyachilarni ko‘raman. Bugun ular qayerda edi? Dushanba kuni deputatlar va xodimlar uchun bu namoyishchi qanday qilib qo‘riqchilarni osongina chetlab o‘tgani haqida to‘liq hisobot talab qilamiz, deb yozdi u X sahifasida.
Izoh (0)