Рамазон ойи кириб келиши муносабати билан Шавкат Мирзиёев номига хорижий мамлакатлар етакчилари, ҳукуматлар ва нуфузли халқаро ташкилотлар раҳбарларидан қутловлар келмоқда. Бу ҳақда Президент матбуот хизмати хабар берди.
Қайд этилишича, хорижий ҳамкорлар ўз қутловларида давлат раҳбари ва мамлакатнинг кўп миллатли халқига тинчлик-осойишталик, фаровонлик ва равнақ тилакларини изҳор этмоқда. Қуйидагилар ўз табрикларини йўллаган:
- Саудия Арабистони подшоҳи Салмон бин Абдулазиз Ол Сауд;
- Саудия Арабистони валиаҳди, Вазирлар Маҳкамаси раиси Муҳаммад бин Салмон бин Абдулазиз Ол Сауд;
- Бирлашган Араб Амирликлари президенти Шайх Муҳаммад бин Зоид Ол Наҳаён;
- Бирлашган Араб Амирликлари вице-президенти, бош вазири, Дубай амирлиги ҳокими Шайх Муҳаммад бин Рошид Ол Мактум;
- Бирлашган Араб Амирликлари вице-президенти Шайх Мансур бин Зоид Ол Наҳаён;
- Миср Араб Республикаси президенти Абдулфаттоҳ ас-Сиси;
- Кувайт давлати валиаҳди Сабоҳ Холид ал-Ҳамад ас-Сабоҳ;
- Иордания Ҳошимийлар Подшоҳлиги подшоҳи Абдулла II;
- Уммон Султони Ҳайсам бин Ториқ Ол Саид;
- Жазойир Халқ Демократик Республикаси президенти Абдулмажид Теббун;
- Фаластин давлати президенти Маҳмуд Аббос;
- Ислом ҳамкорлик ташкилоти бош котиби Ҳусайн Иброҳим Тоҳа.
Қутловлар келишда давом этмоқда.
Шавкат Мирзиёев 28 февраль куни рамазон ойи кириб келиши муносабати билан Ўзбекистон халқига табрик йўллаган эди.
Ўзбекистонда рамазон ойи 1 март, шанба куни бошланди. Президент қарорига кўра, ушбу ойда эҳтиёжмандлар ҳамда илм-маърифат йўлида изланаётган ёшларга ёрдам бериш бўйича ташаббусларни қўллаб-қувватлашга, атроф-муҳитни асраш, муқаддас қадамжо, зиёратгоҳ ва қабристонларни ободонлаштириш, кўчатлар экишга ҳамда рамазон ойи билан боғлиқ тадбирларда меъёрга амал қилиш ва исрофгарчиликка йўл қўймасликка алоҳида эътибор берилади.
Изоҳ (0)