Тошкент вилоятида эркак 5 ёшли қизчага тегажоғлик қилганликда айбланмоқда

Тошкент вилоятида эркак 5 ёшли қизчага тегажоғлик қилгани айтилмоқда. Бу ҳақда “Немолчи.уз” лойиҳасида маълум қилинди.

Жабрланган қизалоқнинг онаси “Немолчи” лойиҳасига мурожаат қилган ва унинг фарзандига нисбатан жиноят содир этилганини айтган. Онанинг сўзларига кўра, ички ишлар органлари вазиятга жиддий муносабат билдирмаган.

“Бу воқеа 11 июнь куни кечки соат 19:00 ларда содир бўлди, бу пайтда қоронғи туша бошлаган эди, қизчам катта опаси билан рўпарада яшайдиган болалар билан ўйнашга кетди. Маҳаллада ҳаммамиз бир-биримизни яхши биламиз, шунинг учун ҳовлининг дарвозалари деярли доим очиқ.

Тахминан 19:00 ларда мен болаларни уйга чақиришга чиқдим. Дарвозага яқинлашиб, ҳовлига югуриб кираётган қизимни кўрдим. У йиғлаб, Шавкат исмли ёши катта одам уни қучоқлаб, шилқимлик қилганини қайта-қайта такрорлади. Аввалига мен ҳайратда қолдим ва у айнан нима қилганини сўрай бошладим. Эшитганларим мени шокка туширди.

Ҳовлидан югуриб чиқиб, шу қўшниникига бордим. У маст эди, ҳамма нарсани рад этди, қизимни ўпганини ва бола уни тамоман нотўғри тушунганини айтди. У билан гаплашишдан фойда йўқлигини тушуниб, эрим билан ички ишлар бўлимига бордим. Улар маҳалла нозирини чақиришди, мен ариза ёзмоқчи эдим, лекин у аризани қабул қилмади. Мен шок ҳолатида эдим, эрим бу қўшнига нисбатан нимадир қилиб қўйишидан қўрқдим.

Стресс туфайли нима қилишни билмай қолдим. Маҳалла нозири аризани барибир қабул қилмади. Шундан сўнг мен шаҳар прокуратурасига ариза ёздим. Ариза топширилганига 6 кун бўлди. Лекин бу одам ҳали ҳам озодликда юрибди. У кўчада бизнинг уйимиз ёнидан ўтади (бу қўшнининг уйи бизникига яқин). Энди ҳовлимизнинг эшигини очишга, уйдан чиқишга қўрқяпман. Мен қизларимдан хавотирдаман”, — дейилади мурожаатда.

Бош прокуратуранинг хабар беришича, 5 ёшли қизчага шилқимлик қилган эркакка нисбатан Жиноят кодексининг 129-моддаси (ўн олти ёшга тўлмаган шахсга нисбатан уятсиз-бузуқ ҳаракатлар қилиш) билан жиноят иши қўзғатилган. 

Нурафшон ИИБ профилактика инспектори хатти-ҳаракатларига ҳуқуқий баҳо бериш мақсадида хизмат текшируви тайинланган.

Болалар омбудсманининг “Дарё”га маълум қилишича, ҳолат ҳақида она томонидан куни кеча хабар берилиши билан болалар омбудсмани вазиятни ўрганишни бошлаган ва назоратга олган. 

Терговга қадар текширув доирасида болага нисбатан судга оид тиббиёт экспертизаси тайинланган. 

“Бола манфаатлари нуқтайи назаридан болалар омбудсмани мазкур жиноят иши бўйича ўз ваколатлари доирасида кузатув олиб бормоқда”, — дейилади изоҳда.