“Хавф чегараси”, “Эдисон”, “Миллиардерлар клуби” ва бошқа кўплаб фильмларда иштирок этган 64 ёшли актёр Кевин Спейси Пирс Морганга интервью берди. Унда актёр жинсий зўравонлик айбловларидан оқлангандан сўнг жиддий молиявий муаммоларни бошдан кечираётганини айтиб берди.
2017 йилда актёр Энтони Реппга нисбатан зўравонлик ва таъқиб қилганликда айбланди. Натижада икки карра “Оскар” совриндорига қарши жиноят иши қўзғатилди. Бир неча судлардан сўнг, 2022 йилда Нью-Йоркдаги ҳакамлар ҳайъати Кевин Спейсини айбсиз деб топди.
Реппнинг сўзларига кўра, 14 ёшида Спейси унга тегажоғлик қилган. Маълум вақтдан сўнг Буюк Британия суди актёрга қўйилган тўққизта жинсий зўравонлик иши бўйича уни айбсиз деб топди. Актёр оқланди, аммо суд жараёни давомида Кевиннинг муваффақиятли карьераси барбод бўлди. Спейсининг ўзи барча айбловларни рад этиб келган.
Интервью вақтида актёр кўз ёшларини тия олмади ва беш йил давомида жуда оғир дамларни бошидан кечирганини айтди. Ҳозирда у миллионлаб долларлик қарзлари туфайли уйсиз қолган.
Суҳбат давомида берилган савол ва жавобларга қисқача тўхталиб ўцак:
Айблов ҳақида
“Бундай ишлар ҳаётимда содир бўлганига ўзим ҳам ишонгим келмаётганини инсонларга билдирмоқчи эдим. Ўзимни худди мени душманлар барча томондан сиқиб, қопқонга туширгандек ҳис этардим”, — дейди актёр.
“Агар улар сизга 34 йил аввал менга мана шундай иш қилган эдингиз, деб айблов қўйишса, қандай муносабат билдирар эдингиз? Балки ўша куни мен маст ҳолда бўлгандирман, лекин ҳеч нарсани эслай олмайман. Албатта, менга айблов қўйишганда даъвогарни ҳам айблаш ўрнига ўзимга биринчи савол бердим: балки ҳақиқатда бирор шармандали иш қилгандирман?”
Молиявий қийинчиликлар
“Менинг уйим кимошди савдосида сотилмоқда, шунинг учун ҳозирда Балтиморга қайтиб, шахсий буюмларимни товарлар сақлаш марказига кўчиришим керак. Ҳозирда қаерда яшамоқдасиз, деган саволингизга жавобим шу: мен уйсиз қолдим”.
“Балтимордаги уйимга 2012 йилда кўчиб ўтган эдим. Ҳозир эса ҳатто ойлик коммунал тўловлар учун маблағим етарли эмас”, — дея тан олади Спейси.
Ҳозир қанча пули борлиги ҳақидаги саволга актёр “Ҳеч қанча” деб жавоб берди.
“Мен ҳали ҳам қарзга ботганман. Миллионлаб қарзим бор..”
Кевин Спейси ўзини қандай шахс сифатида кўради?
Қийинчиликлар актёр оиласи ва дўстлари билан муносабатларини яқинлаштиргани ҳақида ҳам сўзлаб берди:
“Мен шундай салбий воқеалар ичида ҳақиқий дўстлик ва муҳаббатни кўрдим, оиламга, дўстларимга яқинроқ бўлдим. Ўзимни англашга эътиборимни қаратдим. Ҳозирда энг яхши актёр, муваффақиятли киши бўлиш ўрнига шунчаки яхши инсон бўлишга ҳаракат қилмоқчиман. Ўтган йилги воқеалар қадриятларимни қайта кўриб чиқишимга сабабчи бўлганидан мамнунман”, — дейди Спейси.
Изоҳ (0)