2025 йилнинг 7 февраль куни Сирдарё вилояти ҳокимлигининг расмий Telegram саҳифасида «Шаффофлик ва тезкорлик — вилоят ахборот сиёсатининг асоси» деб номланган видеолавҳа эълон қилинди. Унда айтилишича, танқидий ўтган йиғилишда «очиқлик ва шаффофликка алоҳида эътибор қаратилган».
Сирдарё вилояти мансабдорлари чиндан ҳам очиқ ва шаффоф ишлайдими? Буни “E-qaror”га жойлаштирилган ҳужжатлар мисолида кўриб чиқамиз.
Ҳужжатларнинг ярми ёпиқ
Бир ярим ой аввал Сирдарё вилояти ҳокими лавозимига тайинланган Эркинжон Турдимов февраль ойида 73 та ҳужжат имзолаган. Шундан 35 тасини жамоатчиликдан яширилган. Яъни, деярли ярми жамоачилик кўзидан панада.
Сирдарё вилоятидаги шаҳар ва туманлар орасида Сирдарё, Боёвут ва Сардоба туманлари ҳокимликлари “ҳужжатларни яшириш бўйича чемпион”. Улар ўзлари қабул қилган ҳужжатларнинг 47 фоизини беркитган.
Уларнинг ортидан 37-42 фоиз ҳужжатларни яширган Оқолтин, Гулистон туманлари ва Гулистон шаҳри ҳокимликлари ўрин олган.
Қолган туманлар ҳокимликлари томонидан жойлаштирилган қарор ва фармойишларнинг 21 фоиздан 28 фоизгача бўлган қисмининг “юзига қизил парда” тортилган.
-vo9kfsmC.jpg)
Қанақа ҳужжатлар беркитилган?
Хизмат доирасида фойдаланиш учун ёки шахсга доир маълумот важи билан оммадан яширилаётган қарор ва фармойишларнинг аксарияти молиявий характерга эга.
Масалан, халқ депутатлари Сирдарё вилояти Кенгашининг 14 февралдаги VII-9-34-9-0-К/25-сонли қарори платформада беркитиб қўйилган.
Қарорда вилоят маҳаллий бюджетининг 2025 йилда шаклланган эркин қолдиқ манбалари ҳисобидан вилоят ва туманлар ҳокимликлари, соғлиқни сақлаш ҳамда қурилиш ва уй-жой коммунал хизмат бошқармаларига салкам 19 миллиард сўм маблағ ажратиш белгиланган.
Ҳужжат мазмуни ва иловасида шахсга доир маълумотлар мавжуд бўлмаса-да, беркитиб, асоссиз равишда “ХДФУ” белгиси босилган.
Халқ сайлаган депутатлар халқнинг пулини қаерга сарфланаётганини оммадан яшираётгани, афсуски, ачинарли.
Беркитилганлар орасида бошқа масалаларга тааллуқлилари ҳам мавжуд. Масалан, Ширин шаҳар ҳокимининг 4 февралдаги 25-9-131-Ф/25– сонли фармойиши платформада беркитиб қўйилган бўлган.
Фармойишда вилоят ҳокимининг 28 январдаги 16-9-0-Ф/25-фармойишини ижросини таъминлаш мақсадида криминоген вазияти оғир маҳаллаларда жиноятчиликнинг барвақт олдини олиш бўйича самарали тизимни йўлга қўйиш ҳамда криминоген вазиятни барқарорлаштиришга қаратилган манзилли ишларни ташкил этиш белгиланган.
Ажабланарлиси, Президентнинг 2025 йил 3 январдаги “2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида”ги қарори ижросини таъминлаш мақсадида қабул қилинган вилоят ҳокими фармойиши ҳам ёпиқ ҳолда турибди.
Шаҳар ҳокимлиги имзолаган ҳужжатни адлия бўлимлари очиб қўйган.
Худди шундай ҳолатни Боёвут тумани ҳокимининг 3 февралдаги 22-9-123-Ф/25 -сонли фармойишида ҳам кўриш мумкин.
Ҳокимликлар ҳужжатларни беркитиш орқали жамоатчиликдан нимани яширмоқчи?
Масъуллар молиявий характерга эга ҳужжатларни яшириш қонунчиликка зид эканлигини билмайдими? Бундай қонунбузилиш ҳолатларига қачон барҳам берилади?
Изоҳ (0)