“Дарё” нашрида 23 декабрь куни Яшнобод тумани ҳокими Бахтиёр Раҳмонқулов 2024 йил 25 октябрдаги қарори билан ўзини 62 миллион сўм билан мукофотлаганига оид материал эълон қилинган эди.
Унда туман ҳокими, биринчи сектор раҳбари Бахтиёр Раҳмонқулов “Энг ташаббускор сектор” номинацияси ғолиби бўлганлиги муносабати билан туман маҳаллий бюджетининг 2024 йил 2-чорак якунлари бўйича орттирилган маблағлар ҳисобидан 61 миллион сўмдан зиёд маблағ билан мукофотлагани ҳақида ажратиш белгилангани қайд этилган.
Ҳолат юзасидан Давлат хизматини ривожлантириш агентлиги муносабат билдирди.
Таъкидланишича, ҳокимнинг ўзини мукофотлаш тўғрисидаги қарори қонунчиликка мувофиқ қабул қилинган.
“Ҳудудларда ижтимоий-иқтисодий соҳалардаги муаммоларнинг ҳал этилиши, аҳоли билан очиқ, тўғридан тўғри мулоқотни кучайтириш, ҳудудларни ривожлантириш бўйича секторларнинг фаолиятига баҳо беришни назарда тутувчи Вазирлар Маҳкамасининг 2021 йил 23 августдаги 536-сон қарорида:
▫️секторлар фаолияти самарадорлигини баҳолаш Давлат хизматини ривожлантириш агентлиги томонидан автоматлаштирилган онлайн ахборот тизими орқали амалга оширилиши;
▫️баҳолаш натижалари бўйича ҳудудлар даражасида “Энг ташаббускор сектор” йўналиши бўйича ғолиблар аниқланиши ва 1-ўрин учун БҲМнинг 200 баравари, 2-ўрин – 150 баравари, 3-ўрин – 100 баравари миқдорида пул маблағи билан рағбатлантирилиши белгиланган.
Шунга мувофиқ, Тошкент шаҳар ҳокимининг фармойиши (қайси фармойишлиги айтилмаган)га асосан, 12 туманнинг барча 48 та сектори кесимида ўтказилган баҳолаш натижасида Яшнобод тумани ҳокими 1-сектор раҳбари Б.Раҳмонқулов 2-ўринни эгаллаган ва унга БҲМнинг 150 баравари миқдорида пул мукофоти ажратилиши белгиланган.
Юқорида қайд этилган Вазирлар Маҳкамасининг қарорига кўра, мукофот маблағлари маҳаллий бюджетнинг қўшимча манбалари ҳисобидан қопланади.
2024 йил 13 мартда Халқ депутатлари Тошкент шаҳар кенгаши қарори ижросини таъминлаш мақсадида Яшнобод тумани ҳокимининг 2024 йил 24 октябрдаги қарори қабул қилиниб, Б.Раҳмонқуловга 61,9 млн сўм ажратилиши кўрсатилган. Ажратилган маблағдан 12,4 млн сўм ягона ижтимоий тўлов, 5,9 млн сўм даромад солиғи ушлаб қолиниб, Б.Раҳмонқуловга 43,6 млн сўм пул мукофоти берилган.
Юқоридагиларни инобатга олган ҳолда, ижтимоий тармоқларда тарқалган хабарлар бузиб кўрсатилган бўлиб, Яшнобод тумани ҳокими 1-сектор раҳбари Б.Раҳмонқулов қонунчиликка мувофиқ рағбатлантирилганлигини маълум қилинади”, дейилади агентлик расмий муносабатида.
Маълумот учун, материални тайёрлаш жараёнида “Дарё” мухбири билан суҳбатлашган Тошкент шаҳар ва Яшнобод туман ҳокимлиги ахборот хизмати ходими номинация бўйича ғолиб бўлмаганини билдирган.
Изоҳ (0)