Рақобат қўмитаси Uzbekistan Airports аэропортга кириш ҳудудига кириш-чиқиш учун битта такси хизматига рухсат берганини ноқонуний деб топди ва компаниядан барча таксиларнинг терминалга кириши учун шароит яратиш ва тўхташ жойлари нархларини қайта кўриб чиқишни талаб қилди. Бундан норози Uzbekistan Airports қўмита билан судлашди.
Ўзи нима гап?
Тошкент аэропорти ҳудуди ноқонуний такси ҳайдовчиларидан “тозаланиб”, 2022 йил 12 сентябрдан аукцион орқали ғолиб деб топилган такси хизмати — Тахi Airport Tashkent иш бошлаганди. Такси хизматини ташкил этиш бўйича компания уч йилдан ортиқ бўлмаган бензинли автомашиналар паркига, шунингдек, камида уч йиллик тажрибага эга бўлган ҳайдовчилар таркибига эга бўлиши керак эди. Ўтказилган электрон аукционда “Бобур Диёр” компанияси ғолиб бўлганди. Компания аэропорт йўловчиларини ташиш тарифларини Uzbekistan Airports билан келишиб жорий этади.
Рақобат қўмитаси йўловчилар келиш терминали ёнидаги махсус йўлнинг биринчи қаторига фақат битта тадбиркорлик субъектига тегишли автомобилларнинг киришига шарт-шароит яратиб берилгани, ушбу субъектдан тўловлар ундирилмаётгани, унга ташиш учун қатъий белгиланган тариф қўлланиши ва ҳар қандай нархлар ўзгариши келишилиши белгилангани, шунингдек, “техник топшириқ” шартлари талабига мос келувчи лицензияга эга бўлган такси хизматини кўрсатувчи бошқа хўжалик юритувчи субъектларнинг автомобилларини ушбу ҳудудга киритмаётганини рақобатнинг чекланиши деб топди.
Бундан ташқари, аэропорт ҳудудига яқин жойлардаги автотураргоҳлар учун тўлов миқдори оширилганини аниқлаб, тўлов миқдорини қайта кўриб чиқиш бўйича кўрсатма берди.
Uzbekistan Airports қўмитанинг қарор ва кўрсатмасидан норози бўлиб, Тошкент туманлараро маъмурий судига мурожаат қилди. Суднинг 2023 йил 28 мартдаги ҳал қилув қарори билан Uzbekistan Airports шикояти рад этилиб, қўмитанинг қарор ва кўрсатмаси ўз кучида қолдирилди. Uzbekistan Airports аппеляция шикояти асосида иш Тошкент шаҳар маъмурий суди аппеляция инстанцияси томонидан ҳам кўриб чиқилди, аммо 12 июнда шикоятни қаноатлантириш рад этилди. Энди компания Олий судга кассация шикояти билан, шунингдек, такси хизматлари учун янги компанияларни танлаш йўли билан, қўмитанинг буйруғини бекор қилиш учун мурожаат қилмоқчи.
Uzbekistan Airports муносабати
Компания баёнотига кўра, Uzbekistan Airports E-auksion.uz сайтида қонун ҳужжатларига мувофиқ — Тошкент халқаро аэропортининг учиб келиш терминалида такси хизмати учун жой ажратиш бўйича лот ўрнатди. Лотга бир қатор мажбурий ҳужжатлар, жумладан, техник топшириқлар бириктирилган. Унга кўра, такси хизмати бензин ёки электр қувватида ишлайдиган транспорт воситаларига эга бўлиши лозим, сабаби аэропорт ҳудудида газ қатъиян тақиқланган. Шунингдек, такси хизмати йўловчилардан барча шаклларда тўловларни қабул қилишни таъминлаши керак. Ҳайдовчиларга ҳам мажбурий талаблар қўйилган – ягона форма, озода кўриниш, ўзбек, рус ва инглиз тиллари асосини билиш.
“Бугунги кунда Тошкент шаҳрида юзлаб такси компаниялари мавжуд бўлиб, уларда минглаб турли маркадаги, турли йилларда ишлаб чиқарилган, турли ҳолатда ва газда юрадиган автомобиллар мавжуд. Аэропорт ҳудудига киришда уларнинг тоифаланган объектнинг талабларига мувофиқлигини текшириш шунчаки имконсиз. Шу муносабат билан Uzbekistan Airports таксилар билан боғлиқ вазиятни бартараф этиш ва йўловчилар мурожаатларини инобатга олиб, такси хизматларини кўрсатиш бўйича ягона хизматни танлашга қарор қилди. Акс ҳолда, аэропортда тартибни таъминлашнинг иложи йўқ эди”, — дейилади баёнотда.
Uzbekistan Airports акциядорлик жамияти бошқаруви раиси Раъно Жўраева аэропортда газда юрадиган эски машиналар қатъиян тақиқлангани, қиммат нархлар, қўпол ҳайдовчилар бўлишига йўл қўйиб бўлмаслигини аввал ҳам айтиб ўтганди. “Биз бундай машиналарнинг учиб келиш терминали зинапоясигача ҳаракатланишига рухсат бера олмаймиз. Бу нафақат мамлакатнинг салбий имижи, балки йўловчилар хавфсизлигига таҳдиддир. Муаммонинг ягона ечими — расмий такси хизматига ўтиш — бу жаҳон амалиёти”, — деган эди у.
Қайд этилишича, суд ва қўмита Uzbekistan Airportsънинг яна бир қанча такси хизматларини кўрсатувчи компанияларни аукционга қўйиш қарорини ҳисобга олмади. Яқин кунларда E-auksion.uz сайтида яна учта — Тошкент халқаро аэропортининг умумий учиш залида, CIP учиш залида, шунингдек, маҳаллий авиақатновлар терминалида яна бир нуқта очиш бўйича лот жойлаштирилади.
Такидланишича, ягона такси хизмати фаолият кўрсатган йил давомида аэропорт ва ушбу фаолият билан шуғулланувчи компанияга бирорта ҳам шикоят келиб тушмаган, аксинча, йўловчилар доим ижобий фикр билдирмоқда.
“Бир йил олдинги ҳолатга қайтадиган бўлсак: ижтимоий тармоқлар ва турли идораларга, президентнинг виртуал қабулхонасигача аэропортни тозалаш талаби билан доимий мурожаатлар келиб тушган. Эски машиналар, одобсиз ҳайдовчилар, қиммат нархлар, шунингдек, бир неча талончилик ва йўловчиларни калтаклаш ҳолатлари — бугун Uzbekistan Airports буларнинг барчасини ҳеч бўлмаганда ўз ҳудудидан сиқиб чиқаришга муваффақ бўлди”, — дейилади баёнотда.
Энди йўловчи расмий такси хизматларидан фойдаланиши ёки такси агрегаторлари Yandex, MyTaxi ва ҳоказоларни энг яқин автотураргоҳга (терминалдан 50-100 метр масофада) чақириши мумкин, у ерда эса таксилар учун 10 дақиқа бепул туриш вақти берилади.
Изоҳ (0)