Андижон вилояти ҳокими Шуҳрат Абдураҳмонов 9 сентябрь куни “Вилоятда жамоат транспортини ривожлантириш ҳамда йўловчилар транспортида йўловчилар ташиш ҳақининг янги тарифини белгилаш тўғрисида”ги қарорни имзолади.
Қарор билан Андижон шаҳри ҳамда шаҳар атрофи йўналишларида йўловчилар ташиш ҳақининг янги тарифлари белгиланди. Андижон шаҳрида йўлкира автобус қатновлари учун нақд ёки банк картасидан тўланганда 2000 сўм, АТТО транспорт картаси билан тўланганда эса 1500 сўм, йўналишли такси хизматидан фойдаланганда эса 3000 сўм этиб белгиланди.
Шаҳар атрофи йўналишларида эса бир йўловчи километр учун автобусларда 150 сўм, йўналишли такси (микроавтобус)ларда 245 сўм, йўналишли такси (Damas)ларда 300 сўм этиб белгиланди. Мазкур қарор расмий эълон қилингандан сўнг кучга киради. “E-qaror” ягона электрон тизимида қарор билан танишган “Дарё” мухбири ҳужжат қабул қилинганига орадан бир ҳафта ўтган бўлса-да, нега эълон қилинмаганлиги билан қизиқди.
Вилоят ҳокимлиги ахборот хизмати раҳбари Муслимбек Иброҳимов топшириқ ҳужжатлар “E-xat” тизими орқали туширилишини айтиб, шахсан қарордан бехабарлигини билдирди. Бироқ айни шу йўналиш бўйича ишлаётган ахборот хизматининг ходими эълон қилган бўлиши кераклигини таъкидлади.
Ҳокимлик ахборот хизмати бош мутахассиси Озодбек Жабборов эса айни пайтда ушбу қарор эълон қилиш учун тайёрланаётганини билдирган. Ваҳоланки, мазкур қарор қонунчиликка мувофиқ умум мажбурий бўлиб, норматив-ҳуқуқий ҳужжат ҳисобланиб, “Норматив-ҳуқуқий ҳужжатлар тўғрисида”ги қонунининг 38-моддасига мувофиқ “Ўзбекистон Республикаси қонунчилик маълумотлари миллий базаси” ёки маҳаллий давлат ҳокимияти органининг расмий нашрида эълон қилиниши керак эди. Бундан ташқари қонуннинг 40-моддасида, шунингдек, қарорнинг 8-бандида расмий эълон қилинган кундан эътиборан кучга кириши қайд этилганди.
Вилоят ҳокимлиги ахборот хизмати нега бундай сусткашликка йўл қўйди? Наҳотки ҳокимлик қабул қилаётган қарорлар билан доимий танишиб бормаса? Нафақат ҳокимлик ахборот хизмати, балки бошқа ходимлар ҳам “Норматив-ҳуқуқий ҳужжатлар тўғрисида”ги қонундан хабардорми?
Ушбу материал тайёрланиш жараёнида қарор Андижон вилояти ҳокимлигининг расмий телеграм каналида эълон қилинди.
Изоҳ (0)