Фарғона шаҳар ҳокими Восилжон Назаров ўтган йилнинг 25 июль куни собиқ ҳоким Мирзоҳид Убайдуллаев томонидан 2021 йилда имзоланган қарорни ўзгартиришга оид қарорни қабул қилган. Бироқ ҳоким қарорни қабул қилиш жараёнида мавжуд қонун талабларига риоя этмаган.
Қарорга қандай ўзгартириш киритилган?
“Фарғона шаҳар ҳокимининг 2021 йил 26 апрелдаги 301-сонли қарорига ўзгартириш ва қўшимча киритиш тўғрисида”ги қарорда собиқ ҳоким имзолаган қарорнинг 2-бандида мавжуд “лойиҳага мосланган ҳолда 7 қаватли биринчи ва иккинчи қаватларида савдо ва маиший хизмат кўрсатиш комплекси, қолган қаватларида турар жой биноси қуриш” сўзлари “лойиҳага мосланган ҳолда йўл бўйидаги 9 қаватли бинолар ертўла ва биринчи қаватларида савдо ва маиший хизмат кўрсатиш комплекси, қолган қаватларида турар жой биноси қуриш сифатида ҳамда ҳудуднинг ички қисмидаги 9 қаватли бинолар ертўла ва биринчи қаватлари ижтимоий турар жой, қолган қаватларида турар жой биноси қуриш” сўзларига ўзгартирилган. Яъни 7 қаватли бинони ҳоким қарори билан 9 қаватли бинога айлантиришга рухсат берилган.
Қизиғи шундаки, ҳоким қарор қабул қилиш жараёнида фақатгина бир киши — ўзининг маънавий-маърифий ишлар самарадорлигини ошириш, давлат тили тўғрисидаги қонун ҳужжатларига риоя этилишини таъминлаш масалалари бўйича маслаҳатчиси Фарҳод Мамажонов билан келишган. Аммо маслаҳатчи ҳужжат қабул қилинишидан бир кун олдин меҳнат таътилига чиққан эди.
Қонун бузилиши ҳолатлари
Биринчидан, тегишли ҳужжатларга асосан ҳокимлик тегишли таркибий бўлинмалари ҳамда молия-иқтисодиёт ва камбағалликни қисқартириш масалалари бўйича биринчи ўринбосари — иқтисодий тараққиёт ва камбағалликни қисқартириш бўлими бошлиғи билан келишиши шарт бўлса-да келишмаган.
Балки, ҳоким бошқалар билан келишишни истамаган бўлиши ҳам мумкин.
Иккинчидан, ҳокимлик бош юрисконсулти вазифасини вақтинча бажариб турган Адхамжон Рашидов томонидан қарор ер масалаларига оид бўлса-да, “Давлат мулкининг ижара ставкаси” мазмунида юридик хулоса берилган.
Юридик хулоса берган Адҳамжон Рашидов нега ҳокимлик девонхонаси мудири сифатида келишмаганлиги қизиқ.
Учинчидан, Ер кодексининг 5-моддасида давлат ҳокимияти органларининг ер муносабатлари соҳасидаги қарорлари лойиҳалари Адлия вазирлигининг тегишли ҳудудий органларида ҳуқуқий экспертизадан ўтказилиши шарт эканлиги кўрсатилган.
Афсуски, ҳужжат шаҳар адлия бўлимидан ҳуқуқий экспертизадан ўтказилмасдан ими-жимида имзоланган.
Тўртинчидан, президентнинг 2021 йил 8 июндаги “Ер муносабатларида тенглик ва шаффофликни таъминлаш, ерга бўлган ҳуқуқларни ишончли ҳимоя қилиш ва уларни бозор активига айлантириш чора-тадбирлари тўғрисида”ги фармонига асосан 2021 йил 1 августдан бошлаб маҳаллий давлат ҳокимияти органларининг ер муносабатларига оид қарор, фармойиш ёки бошқа турдаги ҳужжат қабул қилиш, ер участкаларига бўлган ҳуқуқларни белгилаш, эътироф этиш, ўзгартириш ҳуқуқи бекор қилинган. Аммо Восилжон Назаров фармон талабларини бузган.
Бешинчидан, ҳужжат қарор қисмида ким томонидан ижро қилиниб, ким томонидан назорат қилиниши кўрсатилмаган, аммо ижрога қаратилиб юборилган.
Адлия ва прокуратура органлари эътибор қилмаган бўлиши мумкин
Президентнинг 2022 йил 21 февралдаги “Ер участкаларидан фойдаланишда давлат назорати самарадорлигини ошириш чора-тадбирлари тўғрисида”ги қарорига кўра, прокуратура органлари зиммасига ер участкаларидан оқилона фойдаланиш ва уларни муҳофаза қилиш соҳасида назоратни янада кучайтириш вазифалари юклатилган.
Шунингдек, Вазирлар Маҳкамасининг 2021 йил 22 июндаги 390-сон қарори билан тасдиқланган низомга асосан Адлия органлари “Э-қарор” электрон тизими орқали ишлаб чиқиш, келишиш, қабул қилиш (чиқариш) рўйхатга олиш ва эълон қилиш жараёнларининг доимий мониторингини олиб бориши, натижаларига кўра эса белгиланган муддатда муносабат билдириши ва масъул ходимларга нисбатан таъсир чораларини қўллаши лозим.
Ҳужжат қабул қилинганига салкам бир ярим йил бўлди. Бу орада адлия органлари ўз ваколати доирасида мониторинг ўтказмагани, ҳудудий прокуратура органлари ҳам эътиборсиз қолдиргани қизиқ.
“Дарё” мавзу юзасидан масъуллардан муносабат кутиб қолади.
Изоҳ (0)