Андижоннинг барча халқ депутатлари кенгашлари жамоатчилик муҳокамасига қўйилмаган маҳаллий бюджетни бир кунда тасдиқлади. Бу Бюджет кодекси талабларига мутлақо зид.
Норматив-ҳуқуқий ҳужжатлар лойиҳалари муҳокамаси порталига қарорлар лойиҳалари 2024 йилнинг 27 декабрь куни жойлаштирилган. Муҳокама муддати 2025 йилнинг 11 январигача этиб белгиланган бўлса-да, улар бир кун ичида келишилган ҳамда ҳуқуқий экспертизадан ўтказилган.
Бир кунда ишлаб чиқилган, ҳуқуқий экспертизадан ўтказилган ва қабул қилинган
27—28 декабрь кунлари Андижон вилоятидаги барча шаҳар ва туманларининг халқ депутатлари кенгашлари раислари ҳудудларнинг 2025 йилги маҳаллий бюджетини тасдиқлашга оид қарорларини имзолади.
Қарорлар Ўзбекистон Республикасининг 2024 йил 24 декабрдаги “2025 йил учун Ўзбекистон Республикасининг давлат бюджети тўғрисида”ги қонуни ҳамда Халқ депутатлари Андижон вилояти кенгашининг 2024 йил 26 декабрдаги VII-3-046-1-0-К/24—сон қарорига мувофиқ қабул қилинган.
Маълумот учун, кенгаш қарори 15 ноябрдан 30 ноябргача бўлган муддатда умумхалқ муҳокамасидан ўтказилган.
Бюджет кодекси талаблари қандай?
Кенгашларнинг ушбу норматив-ҳуқуқий ҳужжат тусидаги қарорлари жамоатчилик муҳокамасидан ўтказилмасдан қабул қилинган.
Ваҳоланки, Бюджет кодексининг 99-моддаси ҳамда Вазирлар Маҳкамасининг “Маҳаллий давлат ҳокимияти органлари фаолиятига “Э-қарор” электрон тизимини жорий этиш чора-тадбирлари тўғрисида”ги қарори билан тасдиқланган низомга асосан туман ва шаҳар ҳокимликлари 10 октябрдан кечиктирмай лойиҳаларни Норматив-ҳуқуқий ҳужжатлар лойиҳалари муҳокамаси порталига жамоатчилик муҳокамаси ўтказилиши учун жойлаштириши лозим эди.
Шунингдек, Бюджет кодексида қарор лойиҳалари жамоатчилик муҳокамаси якунлари бўйича келиб тушган асосланган таклифлар ва фикр-мулоҳазалар асосида қайта кўриб чиқилиб, 1 ноябрдан кечиктирмай тегишинча халқ депутатлари туманлар ва шаҳарлар кенгашларига киритилиши белгиланган.
Адлия бўлимлари ҳуқуқий экспертизадан ўтказган
Бундан ташқари, низомга асосан маҳаллий давлат ҳокимияти органининг юридик хизмати жамоатчилик муҳокамаси якунлангандан сўнг лойиҳа бўйича белгиланган тартибда хулоса тузиши ҳамда лойиҳани ҳуқуқий экспертизадан ўтказиш учун ҳудудий адлия органларига белгиланган тартибда тегишли ҳужжатларни илова қилган ҳолда киритиши шартлиги белгиланган.
Ана шундан сўнг, адлия органлари ҳуқуқий экспертизадан ўтказиб, лойиҳа қонунчилик ҳужжатларига мувофиқ бўлса, хулоса бериши керак. Агарда лойиҳа бўйича таклиф ва эътирозлар мавжуд бўлганида, лойиҳани маҳаллий давлат ҳокимияти органининг юридик хизматига қайтариши зарур.
Афсуски, ҳудудлардаги адлия бўлимлари бошлиқлари жамоатчилик муҳокамасидан ўтказилмаган қарор лойиҳаларини ҳуқуқий экспертизадан ўтказиб, мақсадга мувофиқлиги юзасидан хулоса беришган.
Бундан ташқари, қарорларда уларнинг кучга кириш муддати кўрсатилмаган.
Жамоатчилик муҳокамаси ўтказилгач қарорлар қайта қабул қилинадими?
Ўрганишлар давомида жамоатчилик муҳокамаси порталида қарорлар лойиҳалари улар қабул қилиниб бўлгандан сўнг, ўша куннинг ўзида, яъни 2024 йилнинг 27 декабрь куни жойлаштирилгани маълум бўлди. Муҳокама муддати 2025 йилнинг 11 январигача этиб белгиланган.
Скриншот: regulation.gov.uz
Аммо қарорлар бир кун давомида ишлаб чиқилган, келишилган ҳамда ҳуқуқий экспертизадан ўтказилган. Жамоатчилик муҳокамасига ҳам шу куннинг ўзида жойлаштирилган.
Бундан ташқари, қарорлар кенгашлар раислари томонидан сессия ўтказилмасдан ва депутатлар томонидан тасдиқланмасдан қабул қилинган.
Натижада шошилинч қабул қилинган қарорлар орқали бир қанча қонунбузилиш ҳолатларига йўл қўйилган.
Муҳокамадан ўтказилмаган қарорлар қонунчиликка зид эмасми?
Жамоатчилик муҳокамаси давомида қарорлар юзасидан таклиф ва шикоятлар тушса қандай бартараф этилади? Қарорлар қайта қабул қилинадими?
Қарор лойиҳаси нега аввалроқ муҳокамадан ўтказилмаган?
Туман адлия бўлимлари нега муҳокамадан ўтказилмаган қарорларни ҳуқуқий экспертизадан ўтказди?
“Дарё” шу ва мавзу доирасидаги бошқа саволларга Адлия вазирлигидан жавоб кутиб қолади.
Изоҳ (0)