Ҳар уч ҳужжатнинг бири ёпиқ: водий ҳокимлари жамоатчиликдан нимани яширмоқда?

Жорий йилнинг январь ойида водий вилоятларидаги ҳокимликлар томонидан 3435 та ҳужжат имзоланиб, жойлаштирилган. Ҳужжатларнинг ҳар учтасидан биттаси “шахсга оид” деган важ билан “яшириб” қўйилган. Беркитиш бўйича Андижон вилоятининг Избоскан ҳамда Фарғона вилоятининг Ёзёвон туманлари етакчилик қилган.

“Дарё” январь ойида водий вилоятлари ҳокимликлари томонидан “E-qaror” ягона электрон тизимига жойлаштирилган ҳужжатлар бўйича таҳлилни ўтказди.

Энг кўп яширилган ҳужжатлар қайси вилоятга тегишли

Водий вилоятлари ҳамда шаҳар ва туманлари ҳокимликлари, шунингдек, маҳаллий кенгашлар томонидан 2025 йилнинг 1 январидан 31 январь кунига қадар “E-qaror” платформаси орқали жами 3435 та ҳужжат имзоланган.

Энг кўп ҳужжат Наманган вилоятига тегишли бўлиб, ой давомида ҳокимлик ва кенгашлар томонидан 1311 та қарор ва фармойиш қабул қилинган. Фарғона вилоятида эса 1302 та, Андижон вилояти ҳокимликлари томонидан эса қўшни вилоятдаги ҳамкасбларига нисбатан анча оз, 822та ҳужжат имзоланган.

Умумий ҳисобда водий вилоятларида 33 та норматив тусдаги қарорлар қабул қилинган.

Андижон ва Фарғона вилоятлари ҳокимликлари қабул қилинган ҳужжатларнинг 35 фоизини жамоатчиликдан яширган. Наманган вилоятида эса 26 фоизга яқин, яъни 331 та ҳужжат “ёпиб” қўйилган. 

Оммадан яширилган ҳужжатларнинг аксариятида “шахсга доир маълумотлар, васийлик ва ҳомийлик ёки амалдаги қонунчиликка мувофиқ бошқа турдаги фойдаланиши чекланган ахборот мавжудлиги” ҳамда “хизмат доирасида фойдаланиш учун” белгиси қўйилган.

Вилоят ҳокимлари қанчалик очиқ?

Вилоятлар ҳокимлари орасида энг кўп ҳужжат Фарғона вилояти ҳокими Хайрулла Бозоров томонидан қабул қилинган бўлиб, умумий миқдорда 73тани ташкил этади. Уларнинг 19 таси, яъни салкам 30 фоизи ёпиқ.

Ўн икки йилдан буён бир лавозимда ишлаётган, узоқ йиллик ҳоким Шуҳрат Абдураҳмонов эса январь ойида 46 та ҳужжатни имзолаб, 12 тасини яширган.

Шавкат Абдураззоқов имзолаган 56 та ҳужжатнинг 10таси, яъни 18 фоизи ёпиб қўйилган. имзоланган.Наманган ҳокими январь ойида бошқа ҳамкасбларига нисбатан очиқроқ бўлганлигини кўриш мумкин. 

Андижон: Балиқчида битта ёпиқ ҳужжат мавжуд

Андижон вилоятидаги шаҳар ва туманлар орасида “E-qaror” платформасида ҳужжатларни “яшириш” бўйича Избоскан тумани ҳокимлиги етакчилик қилган. Январь ойида ҳокимлик томонидан жами 40 ҳужжат  (30 таси қарор ва 10 таси фармойиш) жойлаштирилган. Ҳужжатларнинг 34 таси, яъни 85 фоизи яшириб қўйилган. 

Хонобод шаҳри, Булоқбоши, Улуғнор ва Шаҳрихон туманлари ҳокимликлари эса 70 фоизга яқин ҳужжатларни бошқалар кўролмаслиги учун беркитиб қўйган.

Қолган туманлар ҳокимликлари томонидан жойлаштирилган қарор ва фармойишларнинг 15 фоиздан 50 фоизгача бўлган қисмининг “юзига қизил парда” тортиб қўйилган.

 Саккиз йилдан буён Балиқчи туманига ҳокимлик қилиб келаётган Жасурбек Абдураимов томонидан 19 та ҳужжатдан атига биттаси ёпиб қўйилгани таҳсинга лойиқ. 

Фарғона: ёпиқликда етакчи — Бувайда ҳокимлиги

Фарғона вилоятида энг кўп ёпиқ ҳужжат Бувайда тумани ҳокимлигига тегишли бўлиб, 31 та ҳужжатнинг 24 таси, яъни 80 фоизи яширилган.

Данғара, Учкўприк, Ёзёвон ва Ўзбекистон туманлари ҳокимликлари эса 66 фоиз ҳужжатларга “қизил парда тортган”. Марғилон шаҳар ҳокимлиги эса 39 та ҳужжатнинг 23 тасини беркитиб қўйган. Бу жами ҳужжатнинг 60 фоизини ташкил этади.

Қолган ҳокимликларда эса қабул қилинган қарор ва фармойишларнинг 20 фоиздан 50 фоизга бўлган қисми беркитилган. 

Наманган: беркитилган ҳужжатлар камроқ

Водий ҳудудида Наманган вилояти шаҳар ва туман ҳокимликлари бошқаларга нисбатан анча очиқ дейиш мумкин. Сабаби туман ҳокимликлари томонидан платформага жойлаштирилиб, беркитилган ҳужжатлар 50 фоизга ҳам етмайди.

Вилоятда Поп тумани ва Тўрақўрғон туманлари ёпиқлик бўйича етакчилик қилса-да, умумий ҳисобда беркитилган ҳужжатлар 40 фоизга ҳам етмайди. Мисол учун, Поп тумани 88 та ҳужжатдан 35 тасини, Тўрақўрғон тумани эса 79 та қарор ва фармойишнинг 31 тасини яширган.

Қабул қилинган қарор ва фармойишларни Давлатобод (64 тадан 9 таси),  Чортоқ (65 тадан  9 таси) ҳамда Янги Наманган (70 тадан 16 таси) туманлари ҳокимликлари жамоатчиликка очиқ ва ошкора эълон қилаётган таҳсинга сазовор. 

Ёпиқ ҳужжатларнинг аксарияти молиявий характерга эга

“Яширилган” қарор ва фармойишларнинг аксарияти молиявий характерга эга. Шу сабабли оммадан яширилаётган бўлиши мумкин.

Масалан, Ёзёвон тумани ҳокимининг 24 январдаги 21-11-165-Қ/25 – сонли қарори платформада беркитиб қўйилган бўлган. 

Қарорда туман маҳаллий бюджетининг 2025 йил бюджет параметрларида назарда тутилган захира жамғармаси маблағлари ҳисобидан туман ҳокимлигидаги раҳбар ходимларга қулай шарт-шароит яратиш ва туманнинг келгусидаги иқтисодий-ижтимоий кўрсаткичларини узлуксиз ва изчил давомийлигини таъминлаш мақсадида хизмат уйлари хариди учун 570 миллион сўм ажратиш белгиланган.

Мазкур қарорнинг нега оммадан яширилгани бизга қоронғи. Ҳужжат мазмуни ва иловасида шахсга доир маълумотлар ҳам мавжуд эмас бўлса-да, асоссиз равишда “ХДФУ” белгиси босилгани эса, янада қизиқ.

Худди шундай ҳолатни Бағдод тумани ҳокимининг 29 январдаги 10-11-152-Ф/25-сонли фармойишида ҳам кўриш мумкин. Фармойишда кенгаш, ҳокимлик ва бир қатор тузилмаларнинг раҳбар ҳамда ходимларига устама белгилаш учун 545 миллион сўм ажратиш белгиланган.

Ёпиқлик қонунбузилишларга сабаб бўлмоқда

Ҳокимликлар ҳужжатларни беркитиш орқали нафақат ўз қилмишларини жамоатчиликдан яширяпти, балки шу орқали Бюджет кодекси, “Норматив-ҳуқуқий ҳужжатлар тўғрисида”, “Давлат ҳокимияти ва бошқаруви органлари фаолиятининг очиқлиги тўғрисида”ги ва бошқа бир қатор қонун ҳамда қонуности ҳужжатларнинг талаблари бузилишига йўл қўймоқда.

“Дарё” “E-qaror” платформасига жойлаштирилган ҳужжатларни кузатишда давом этади.