2025-yilning 7-fevral kuni Sirdaryo viloyati hokimligining rasmiy Telegram sahifasida «Shaffoflik va tezkorlik — viloyat axborot siyosatining asosi» deb nomlangan videolavha e’lon qilindi. Unda aytilishicha, tanqidiy o‘tgan yig‘ilishda «ochiqlik va shaffoflikka alohida e’tibor qaratilgan».
Sirdaryo viloyati mansabdorlari chindan ham ochiq va shaffof ishlaydimi? Buni “E-qaror”ga joylashtirilgan hujjatlar misolida ko‘rib chiqamiz.
Hujjatlarning yarmi yopiq
Bir yarim oy avval Sirdaryo viloyati hokimi lavozimiga tayinlangan Erkinjon Turdimov fevral oyida 73 ta hujjat imzolagan. Shundan 35 tasini jamoatchilikdan yashirilgan. Ya’ni, deyarli yarmi jamoachilik ko‘zidan panada.
Sirdaryo viloyatidagi shahar va tumanlar orasida Sirdaryo, Boyovut va Sardoba tumanlari hokimliklari “hujjatlarni yashirish bo‘yicha chempion”. Ular o‘zlari qabul qilgan hujjatlarning 47 foizini berkitgan.
Ularning ortidan 37-42 foiz hujjatlarni yashirgan Oqoltin, Guliston tumanlari va Guliston shahri hokimliklari o‘rin olgan.
Qolgan tumanlar hokimliklari tomonidan joylashtirilgan qaror va farmoyishlarning 21 foizdan 28 foizgacha bo‘lgan qismining “yuziga qizil parda” tortilgan.
-vo9kfsmC.jpg)
Qanaqa hujjatlar berkitilgan?
Xizmat doirasida foydalanish uchun yoki shaxsga doir ma’lumot vaji bilan ommadan yashirilayotgan qaror va farmoyishlarning aksariyati moliyaviy xarakterga ega.
Masalan, xalq deputatlari Sirdaryo viloyati Kengashining 14-fevraldagi VII-9-34-9-0-K/25-sonli qarori platformada berkitib qo‘yilgan.
Qarorda viloyat mahalliy byudjetining 2025-yilda shakllangan erkin qoldiq manbalari hisobidan viloyat va tumanlar hokimliklari, sog‘liqni saqlash hamda qurilish va uy-joy kommunal xizmat boshqarmalariga salkam 19 milliard so‘m mablag‘ ajratish belgilangan.
Hujjat mazmuni va ilovasida shaxsga doir ma’lumotlar mavjud bo‘lmasa-da, berkitib, asossiz ravishda “XDFU” belgisi bosilgan.
Xalq saylagan deputatlar xalqning pulini qayerga sarflanayotganini ommadan yashirayotgani, afsuski, achinarli.
Berkitilganlar orasida boshqa masalalarga taalluqlilari ham mavjud. Masalan, Shirin shahar hokimining 4-fevraldagi 25-9-131-F/25– sonli farmoyishi platformada berkitib qo‘yilgan bo‘lgan.
Farmoyishda viloyat hokimining 28-yanvardagi 16-9-0-F/25-farmoyishini ijrosini ta’minlash maqsadida kriminogen vaziyati og‘ir mahallalarda jinoyatchilikning barvaqt oldini olish bo‘yicha samarali tizimni yo‘lga qo‘yish hamda kriminogen vaziyatni barqarorlashtirishga qaratilgan manzilli ishlarni tashkil etish belgilangan.
Ajablanarlisi, Prezidentning 2025-yil 3-yanvardagi “2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish bo‘yicha chora-tadbirlar to‘g‘risida”gi qarori ijrosini ta’minlash maqsadida qabul qilingan viloyat hokimi farmoyishi ham yopiq holda turibdi.
Shahar hokimligi imzolagan hujjatni adliya bo‘limlari ochib qo‘ygan.
Xuddi shunday holatni Boyovut tumani hokimining 3-fevraldagi 22-9-123-F/25 -sonli farmoyishida ham ko‘rish mumkin.
Hokimliklar hujjatlarni berkitish orqali jamoatchilikdan nimani yashirmoqchi?
Mas’ullar moliyaviy xarakterga ega hujjatlarni yashirish qonunchilikka zid ekanligini bilmaydimi? Bunday qonunbuzilish holatlariga qachon barham beriladi?
Izoh (0)