Айрим маҳаллий давлат ҳокимияти органлари ҳужжатлари E-qaror электрон тизимидан ўчириб юборилгани ва йўқолиб қолгани юзасидан Адлия вазирлиги маълумот берди.
Таъкидланишича, ҳукумат қарорига асосан 2021 йил 1 июлдан бошлаб E-qaror электрон тизими орқали ишлаб чиқилган ҳоким қарорлари автоматик тарзда рақам берилиб, тизимда эълон қилиб борилмоқда (хизмат доирасида фойдаланиш учун мўлжалланган ҳужжатлар бундан мустасно).
Шу кунгача ҳоким қарорларининг 100 га яқин намуналари тизимга жойлаштирилди, автоматик статистик таҳлил қилиш ва барча жараёнларни адлия органлари томонидан мониторинг қилиб бориш имконияти яратилди. Тизим йўлга қўйилиши натижасида:
- бутун республика миқёсида ҳокимлик қарорларини ишлаб чиқиш, қабул қилиш ва эълон қилиш электрон тарзда бир манзилдан туриб амалга оширилмоқда;
- тизимдан 24/7 режимида ва Интернет тармоғи мавжуд бўлган дунёнинг истаган нуқтасидан фойдаланиш имконияти мавжуд;
- соҳага замонавий ахборот-коммуникация технологиялари жорий этилиши натижасида ҳокимлик қарорлари сохталаштирилиши олди олинди;
- ҳозирга қадар 255 мингдан ортиқ ҳоким қарорлари бирорта қоғоз ишлатилмасдан электрон тарзда қабул қилинди, натижада 1,2 млн дона ёки 6 тонна қоғоз тежалди;
- ҳоким қарорларини ишлаб чиқиш ва тегишли ташкилотлар билан келишишга кетадиган вақт сезиларли даражада қисқарди (-25—30 фоиз);
- қарор лойиҳаларини ҳокимга имзолаш учун юридик хизматни четлаб ўтган ҳолда киритиш имконияти бартараф этилди;
- ҳоким қарорлари устидан жамоатчилик назорати ўрнатилди (аввал бундай имконият бўлмаган).
Иқтисодчи Отабек Бакиров ўзининг Телерам каналида «Шахсий маълумотларни яшириш учунми, бошқа сабаб биланми, E-qaror тизимида ўзгартириш киритиш функцияси ҳокимиятлар ихтиёрида умуман бўлмаслиги керак», дея пост қолдирган эди.
Ўзини адлия тизимида ишлашини қайд этган ўқувчилардан бири қолдирган хабарга кўра, E-qaror тизимидан қарорлар ўчирилмайди, балки яшириб қўйилади. Адлия вазирлиги базадан қарорларнинг йўқ бўлиб қолаётгани масаласида расмий изоҳ бергани йўқ.Айтилишича, шахсий маълумотларга оид маълумотларни ҳимоялаш учун яшириб қўйиш функцияси мавжуд экан. Лекин ҳокимиятлар бу функцияни ўринли қўллаш ўрнига, бутун бошли қарорларни ўчириб қўйиш учун ишлатишмоқда.
Амалда ҳокимият қарорларида шахсий маълумотлар бемалол ошкор қилиниб ётипти. Мана битта мисол. Андижон вилояти кенгашининг VI-43-162-1-0-К/22 қарори. Фуқароларниинг нафақат исми-шарифи, яшайдиган манзилларигача очиқ ошкор кўрсатилган. Бунақа мисолларни юзлаб келтириш мумкин, — деб ёзади у.
Изоҳ (0)