Комик актриса Ҳалима Ибрагимованинг ролларидан кўра, ижтимоий тармоқлардаги тортишувлари кўпроқ баҳсларга сабаб бўлади. Агар шартаки ва жанжалкаш Ҳалимахон Иброҳимованинг ҳаёт ва ижодига қизиқсангиз, албатта, қуйидаги маълумотларни ўқинг.
“Прокурор бўламан, дердим”
Актриса Ҳалима Ибрагимова 1979 йили Убайдулла ва Мунира Ибрагимовалар оиласида учинчи қиз фарзанд бўлиб дунёга келган. Актриса болалигини фақат ширин хотиралар билан эслайди.
— Болалигим жуда ажойиб ўтган. Раҳматли отамнинг маҳалла-кўйда ҳурмати баланд эди. Убайдулла аканинг қизиман, десам ҳамма танирди. Чунки отам юқори лавозимда ишлаган, қўлидан келган ёрдамини аямайдиган, саҳий инсон бўлган. Онам эса тўрт қизининг тарбияси билан банд эди. Отам ҳамиша кўнглимизга қарар, оғзимиздан чиққанини муҳайё қиларди. Онам эса аксинча, ниҳоятда қаттиққўл ва ҳамма қизидан уй ишларини қилишни талаб қиладиган аёл эди. Отам кечаси кўчада юришимизни истамасди, соат олтидан кейин ҳеч ким кўчага чиқмасди.
Болалигимда санъатга умуман қизиқиш бўлмаган, прокурор бўламан деб ният қилардим. Шу сабаб уч марта ҳуқуқшунослик коллежига ҳам ўқишга топширганман. Аммо қабул қилишмаган, — дейди актриса.
“16 ёшимда отамдан айрилдим”
Актриса отасининг ўлими билан боғлиқ воқеаларни қуйидагича эслайди.
— Отам раҳматли 16 ёшимда юрак хуружидан вафот этган. Ўшанда отам эндигина 42 ёшни қаршилаганди. Отам яхши пул топадиган инсон бўлган. Аммо топганини жамғариб қўймай, одамларга ёрдам беришни яхши кўрарди. Зинадан йиқилиб тушгани ҳақида хабар келди. Кейин билсак, ўшанда биринчи инфарктни бошдан кечирган экан. Орадан кўп ўтмай, яна тоби қочди. Касалхонага бирга борганман, отам қўлимда жон берган, — дейди актриса.
“Бозорда тирикчилик қилишга мажбур бўлдим”
Оиланинг молиявий аҳволи сабаб актриса ишлашга мажбур бўлгани ҳақида гапиришдан уялмайди.
— Отам даврида оиламиз молиявий жиҳатдан умуман қийналмаган. Катта еб, катта ичишга ўрганиб қолганимиз учун отамнинг вафотидан кейин ишлашимга тўғри келган. Отамнинг ўлимидан кейин синглим бир боласи билан ота уйимизга қайтиб келди. Уч аёл уйдамиз, ёш боланинг ҳам ўзига яраша ҳаражатлари бор. Ўйлаб-ўйлаб, охири “қора бозор”да тирикчилик қилишга мажбур бўлдим. Чунки вазият шу даражага етгандики, рўзғор учун уйдаги техника ёки мебелларни сотишни бошлагандик. Сармояга киритадиган маблағим бўлмагани учун бошқаларга ишчи эдим. Яъни кунлик ишим учун ҳақ олардим. Ундан кейин етти йил мобайнида “Фарҳод” бозорида ишлаганман. Бозор мени тарбиялаб, ҳаёт мактабини ўргатган, десам ҳам бўлади, — дейди Ҳалима Ибрагимова.
“Аввал феълим бундай эмасди”
Актриса асабий бўлиб қолишига атрофдагилар сабабчи бўлгани ҳақида ҳам айтиб ўтди.
— Баъзан асабийлашиб, оғир гапириб юборишимни биламан. Мен ҳам онамнинг қорнидан шундай туғилмаганман. Ўзгаришимга одамларнинг ўзи сабабчи бўлган. Бозорда ҳаққимни талаб қилиб, бақир-чақир қилмасам, нон тополмаслигимни тушунганимдан кейин ўзгарганман. Бозор катта майдон, унда фақат кучлилар нон топади. Ишлашни бошлаганимдан кейин оиламизнинг молиявий аҳволи анча яхшиланган. Аммо олти йилдан кейин онам ҳам юрак хуружи билан касалхонада вафот этган. Онамдан 22 ёшимда етим қолганман, — дейди актриса.
“Шукурулло Исроилов тўйда кўриб, қўнғироқ қилган”
Актриса санъатга қизиққани ва Шукурулло Исроилов билан танишувини қуйидагича эслайди.
— Санъаткор бўлишимда Шукурулло Исроиловнинг ўрни катта. Шу боисдан ҳам у инсонни устозим деб биламан. Бир куни тўйга борганмиз, хизматга Шукурулло ака келган. Қизлар билан ҳазил-ҳузул қилиб рақсга тушганман. Ҳаракатларимни Шукурулло Исроилов кузатиб ўтирган экан. Ўшанда гала-концертга тайёргарлик кўришаётган бўлган. Хуллас, тўйнинг эгасига қўнғироқ қилиб, менинг рақамимни олган. “Концертга чиқасанми?” деганида қўрққанман. Аммо ўша пайтдаги руҳий ҳолатимда ниманидир ўзгартиришим керак эди. Рози бўлганман, энг қизиғи, томошамиз барчага манзур бўлган. Ана шундан кейин институтга ҳужжат топширганман ва Драма актёрлиги бўлимида таҳсил олганман, — дейди актриса.
“Турмушга чиқиш кўнглимга сиғмаган”
Актриса оилавий шароити сабаб вақтида турмушга чиқолмагани, аммо бундан афсусланмаслигини айтиб ўтди.
— Яширмайман, бир марта 22 ёшимда совчи келган. Аммо рад жавобини берганман. Чунки у пайтда турмушга чиқиш ҳақида ўйлаб ҳам кўролмасдим. Онам оғир касал, синглим билан навбатма-навбат ухламай онамнинг олдида ўтирардик. Шу сабаб оила қуриш хаёлимга ҳам келмаган.
Ота-онамнинг ўлимидан кейин сиқилиб қолганман. Атрофимдаги инсонларнинг бари йигитлар эди. Чунки болаликдан қизлар билан чиқишмайман. Улар билан дискотекаларга борардим, сочларимни ҳам улардек кестириб юрардим. 28 ёшимда эса менга оила қуриш таклифини беришди. Аввалиги устимдан куляпти деб ўйладим, — дейди актриса.
“Турмуш ўртоғимни кўриб, ёш бола-ку, деганман”
Актриса нега ўзидан 7 ёш кичик йигит билан оила қургани ва тўйдан аввалги “шартнома”лар ҳақида қуйидагиларни гапиради.
— Турмуш ўртоғим катта опамнинг қўшниси бўлган. Ўғил тўй қиламиз деб уйни таъмирлатаётганимизда поччам ҳашарга олиб келган. Аввалига поччам “Сенга уйланмоқчи”, деганида “Устимдан куляпсизми, ҳали ёш бола-ку”, деганман. Чунки у пайтда мен 28 ёшда, турмуш ўртоғим эса 21 ёшда бўлган. Кейин қайнонам совчиликка келган. “Барибир оила қуриб, фарзандли бўлишинг керак”, дейишганидан кейин оила қурганман. “Ҳалима эри билан 10 йилга шартнома тузган, пулига уйланган”, деган гап-сўзлар мутлақо асоссиз. Бу инсонни бошимга мусибат тушганида ҳам синаганман. Олдимда дўстларим қолмаганда, у инсон қўллаб-қувватлаган, — дейди актриса.
“Қайнонамга ростини айтганман”
Актриса ўз-ўзини турмушга бергани ва унинг феъл-атворини қайнона ва қайнотаси қандай қабул қилгани ҳақида сўзлаб берди.
— 28 ёшимда ўзимни ўзгартиришим қийин эди. Шу боис турмуш ўртоғимга “боримча қабул қилоласизми?” деганман. Сохталикни ёмон кўраман, атрофдагиларнинг кўзига бошқача бўлиб кўринолмайман. Турмуш ўртоғимни сизлай олмаганман, қайнонамга ҳам эрталаб вақтли туролмаслигимни аввалдан айтганман. Ҳатто қайнонам раҳматлига “сизни ойижон деёлмайман”, деганим ҳам эсимда.
Турмуш ўртоғим оғир-босиқ, феъл-атворимиз бир-биридан кескин фарқ қилади. Ундан сабрни ўргандим, — дейди актриса.
“Уч ойда болали бўлди”
Комик актриса бир пайтлар хонанда Озода Нурсаидова билан яқин бўлган. Муносабатлари бирдан совуқлашишининг сабабини актриса қуйидагича изоҳлайди.
— Бирга ишлаганмиз, у инсоннинг санъатини ҳурмат қиламан. Аммо биргина гапи кўнглимга оғир ботган, шуни кечиролмайман. Тўйдан кейин анча вақтгача ҳомиладор бўлолмаганман. Яширмайман, шифокорлар озмасанг, фарзандли бўлолмайсан, дейишган. Тинимсиз даволаниб юрганим ҳақида айтгандим. Ундан кейин ҳомиладор бўлдим, аммо бу ҳақда опа-синглимдан бошқа ҳеч кимга айтмадим. Бу ирим-сирим эмас, шунчаки эрта қувониб қўймай, дегандим. 30 ёшга тўлишим муносабати билан юбилей қилдим, ундан кейин қишда фарзандли бўлиб, мартда бешик тўйи қилдик. “Туғилган кунида келаси йил бешик тўйига келайлик, дегандик, уч ойдан кейин болали бўлди”, деб микрофонда гапиргани кўнглимга оғир ботган. Тўла аёлларда ҳомиладорлик сезилмайди, кейин қачон фарзандли бўлишим ҳақида ҳаммага айтишга мажбур эмасман-ку. Шу гапдан кейин алоқаларни йиғиштиришга қарор қилганман, — дейди актриса.
“Озода Нурсаидованинг синглиси деб билишаркан”
Актриса айни кунларда Юлдуз Усмонова билан бирга. Икки хонанданинг низога боришида унинг ҳам ҳиссаси борми?
— Анча вақт ўтиб, жиянимнинг тўйини қиладиган бўлдик. Чаллари маросимига Юлдуз Усмоновани чақиришни ният қилгандик. Ҳамма қатори маъмур билан боғланиб, пулини келишиб, тўйга таклиф қилганман. Фақат телефонда Шукурулло Исроилов билан концертларга чиқадиган актриса эканлигимни айтганман, холос. Энг қизиғи, улар мени Озода Нурсаидованинг синглиси деб билишаркан. Юлдуз опани кутиб олишга чиққанимда, мухлиси эканлигимни айтганман. Танишувимиз жуда оддий кечган. Айримлар ўйлагандек, икки хонанданинг низога боришида менинг ҳиссам йўқ. Мен ҳақиқатан ҳам Юлдуз Усмонованинг мухлиси бўлганман, Озода Нурсаидованинг санъатини ҳам ҳурмат қилганман, шу холос, — дейди актриса Ҳалима Ибрагимова.
“Бола асраб олмоқчи бўлгандим”
Ижтимоий тармоқларда актриса қизини асраб олгани ҳақида ҳам миш-мишлар тарқалганди.
— Икки фарзандимни ҳам ўзим дунёга келтирганман. Бунга фақат шукрона келтираман. Аммо ҳақиқатан ҳам қиз фарзанд асраб олмоқчи бўлганман. Узоқроқ танишимиз бешинчи фарзандга ҳомиладор бўлган, эри эса қандайдир жинояти сабаб қамалиб қолган. Аёл бешта бола билан ижра уйда яшарди. Хуллас, у болани кимгадир бериб, ишлаш нияти борлигини эшитиб, ёрдам қилмоқчи бўлганман. Аёл ҳам, эркак ҳам болани беришга рози бўлган. Болани уйимга олиб келиб, унга алоҳида хона тайёрлаганман, энага ёллаганман. Меҳрим тушиб қолган, уни ҳақиқатан ўз боламдек қабул қилганман. Аммо ҳамма ҳужжатлар тайёр бўлганида эр-хотин айниб қолишган. Ўйлаб қарасам, уларнинг аввалдан болани бериш ниятлари бўлмаган, шунчаки бир оз дам олмоқчи бўлган, — дейди актриса.
“Ўлимим ҳақида эшитганда...”
Актриса жиноий жавобгарликка тортилгани, озодликдан маҳрум этилгани ва вафот этгани ҳақидаги хабарлар 2013 йили яшин тезлигида тарқалган. Актриса ўша йили бошига қандай мусибат тушганини қуйидагича изоҳлайди.
— Оилавий тадбиркорлик билан ҳам шуғулланамиз. Опа-сингилларимнинг фаолияти пул айирбошлаш билан боғлиқ бўлган. Хуллас, улар рейдга тушиб қолган ва ҳаммасини терговга олиб кетишган. Бу хабарни эшитганимда қўрқиб кетганман, болаларимни олиб яширинишга мажбур бўлганман. Мен ота уйимда яшайман, опаларим ҳам шу уйда рўйҳатда туришади. Шу боис уйимизда тинтувлар бўлган. Ўша пайтда кимнинг дўст эканлигини билиб олганмиз. Чунки кўпчилик ўзидан итарган, худдики биз билан алоқа қилса, бошига бир кулфат тушадигандек тутган. Энг ёмони, менинг ўлганим ҳақидаги хабарни опа-сингилларим эшитганда шок ҳолатига тушишган. Оиламизда айлабланганлар бўлди, аммо мен судланганим йўқ. Опа-синглим оиласи бағрига қайтгунича 11 та болага қараганман. Болаларнинг “қачон қайтишади, эртага келишадими?” деган саволлари дилимни хун қиларди, — дейди актриса.
“Мард бўлса, юзимга гапирсин”
Актриса ижтимоий тармоқдаги кузатувчилари билан кўп низога бориши ва бунинг учун бир неча марта жазолангани ҳақида айтиб ўтди.
— Мен ҳам одамман, менда ҳам кўнгил бор. Ижтимоий тармоқларга “семиз” деб шунчалик ҳақоратли сўзни ёзишадики, чидаб бўлмайди. Гўёки мен қоматимнинг қандайлигини билмайман, у менга гапириб беряпти (кулиб). Туғилганимдан бери шу қомат билан яшайман, бизнинг оилада озғин инсоннинг ўзи бўлмаган. Кейин турмуш ўртоғим ва болаларимни ҳақоратлаб ёзишларига чидолмайман. Мард бўлса, юзимга гапирсин, — дейди актриса.
“Маъмур Холмедовнинг гапига чидолмадим”
Актриса Маъмур Холмедовни уриб, юзида жароҳат қолдиргани ва мушт туширишга уста эканлиги ҳақида гапирди.
— Нимадандир жаҳлим чиқса, чидаб туролмайман. Концерт пайтида Аваз Охунга, Ботирхон Имомхўжаевга ва Маъмур Холмедовга мушт туширганман. Аҳад Қаюмнинг еган калтаги эса ҳаммага маълум. Тўғриси, Маъмурни урганимга афсусланаман, чунки юзида ширам қолиб кетган. Хуллас, воқеа мана бундай бўлган. Маъмурнинг машинаси йўқ эди, ҳар доим репитициядан кейин “қайси йўлдан юрасиз?” деб сўрарди. Пули бор, аммо машина ҳайдашга қизиқмасди. Ботир, Маъмур ва мен репитициядан кейин фастфуд емоқчи бўлганмиз. У қаҳва тайёрлайдиган машинани кўрсатиб, ўшандан олмоқчи эканлигини айтиб қолган. “Аҳмоқ, шунча пулга шунақа машина оласанми, ундан кўра тўрт ғилдираклигини олсанг бўлмайдими?” деб уришиб кетганман. Жаҳл билан юзига мушт туширганимда, юзи ёрилиб қон чиққан, — дейди актриса.
“Пул бериб кинода тушмайман”
Актриса бир неча йилдирки, фильмларда суратга тушмайди. Бунинг сабабини қуйидагича изоҳлади.
— Таклифлар кўп бўлди. Аммо қоматим ва феълимдан фойдаланиб, фақат шундай роллар беришларидан чарчадим. Яхши роллар беришларини истайман. Бундай роллар ҳам бўлди, аммо таклиф қилган режиссёр фильмига ҳомийлик қилишимдан умидвор бўлади. Бир нечтаси “Бунча берсангиз, мана бу рол сизники”, деди. Тошингни тер, мен пул бериб рол ижро этадиган актриса эмасман, деб ҳайдаб солдим. Шу боис яқин орада бирорта фильмда суратга тушганим йўқ. Бир нечта бизнесларимга инвестиция киритганман, ижтимоий тармоқлардан ҳам ҳақ оламан. Хуллас, пул бериб рол ижро этиш керак эмас, — дейди актриса.
Изоҳ (0)