Сурхондарё вилояти ҳокими Улуғбек Қосимов 14 январь – Ватан ҳимоячилари куни муносабати билан вилоят ҳокими ўринбосарлари ҳамда шаҳар ва туман ҳокимларини мукофотлаш учун 661 миллион сўм ажратди. Бу бўйича 20 январь куни вилоят ҳокимининг фармойиши қабул қилинган.
Фармойишда вилоят ҳокимининг биринчи ўринбосарининг 2025 йил 14 январдаги билдиришномаси ҳамда вилоят Иқтисодиёт ва молия бош бошқармасининг 2025 йил 14 январдаги хати инобатга олиниб, вилоят бюджетининг жорий йил бошида шаклланган эркин қолдиқ маблағлари ҳисобидан 14 январь – Ватан ҳимоячилари куни муносабати билан ўз фаолиятларида эришаётган муваффақиятлари, ўзларига юклатилган вазифаларни виждонан, сифатли ва ўз вақтида бажараётганликлари учун мукофотлаш белгиланган. Бунинг учун жами 661 миллион 250 минг сўм ажратилган.
Жумладан, вилоят ҳокимининг 7 нафар ўринбосарларини рағбатлантириш учун 201 миллион 250 минг, вилоят ҳокимининг оила ва хотин-қизлар масалалари бўйича ўринбосари – вилоят Оила ва хотин-қизлар бошқармаси бошлиғини рағбатлантириш учун 28 миллион 750 минг минг, шунингдек, Термиз шаҳар ва туманлар ҳокимларини рағбатлантириш учун эса 431 миллион 250 минг сўм ажратилган.
Вилоят ҳокимлиги фармойишига асоссиз равишда ХДФУ (хизмат доирасида фойдаланиш учун) белгисини қўйган. Шунингдек, “шахсга оид” деган важ билан беркитиб қўйилган.
“Давлат ҳокимияти ва бошқаруви органлари фаолиятининг очиқлиги тўғрисида” қонунининг 5-моддасига кўра, бюджетдан ажратиладиган маблағлар, бюджет ташкилотларининг бюджетдан ташқари жамғармалари маблағларидан фойдаланилиши тўғрисида тегишли ахборот давлат ҳокимияти ва бошқаруви органларининг фаолияти тўғрисидаги ахборот жумласига кириши белгиланган. Бундан кўриниб турибдики, қонунчиликка мувофиқ ушбу фармойиш бюджет тақсимотига доир бўлгани боис очиқ кўриниб туриши шарт эди.
Қизиқ жиҳати, рағбатлантишга шунча маблағ ажратган ҳокимликнинг 12 та ижро ҳужжатлари бўйича жами 48 миллион 795 минг сўм қарздорлиги мавжудлиги ва айримлари бир неча йиллардан буён тўланмай келаётганини кўриш мумкин.
Ушбу рағбатлантириш вилоят иқтисодиёти гуллаб-яшнаётганини англатмайди. Аксинча, 2024 йилда вилоятда маҳаллий бюджет даромадлари 3,1 трлн сўмни, харажатлари эса 4,9 трлн сўмни, дефицит 1,8 трлн сўмни ташкил этган. 2025 йилда эса республика бюджетидан вилоят бюджетига ажратиладиган тартибга солувчи бюджетлараро трансфертлар миқдори 2 трлн 62 млрд сўмни ташкил этиши кутилмоқда.
Изоҳ (2)
Хоким боба биз Термиз шахрида яшаймиз ипотека киридит ка 5йил олдин уй олганмиз ногирон боларим билан яшаб келяпман бокувчим ёк касалчилик туфайли банкдан олган уйимиз ни киридитини тулолмай колганмиз банк уйимни судга оширди суд мипга оширди уйимни ауксиёнга куямиз деб бир ой мухлат берган бокувчим йок икки норасида гудакларим билан кайирга бораман илтимос менга ёрдам килинг Термиз шахар мангузар махахалласидан
Undan kura yetim yesir, nochor oilalarga taqsimlangani adolatli bo'lar edi. Hokimlik organlarining oylik maoshi yetarlicha deb o'ylayman. Kimgadir bu pullar arzimasdek go'yo lekin shunday insonlar borki ularga xozir 1 so'm xam juda qadirli. Xulosa o'zingizdan...