Бухоро вилоятида саксовул ўсимликлари савдоси билан шуғулланувчи ҳуқуқбузарлар аниқланди, деб хабар бермоқда вилоят Экология бошқармаси.
Унда айтилишича, Ромитан туман бўлими инспекторлари ҳамда туман Ички ишлар бўлими томонидан Учқур чўл ҳудудида навбатдаги рейд тадбири ўтказилди. Тадбир давомида Пешку туманида яшовчи фуқаро Ш.И. чўл ҳудудидан табиий ҳолатда ўсган саксовул ўсимликларини ноқонуний тарзда синдириб, олиб кетаётгани аниқланди.
Ҳолат юзасидан ҳуқуқбузар фуқарога нисбатан Маъмурий жавобгарлик тўғрисидаги кодекснинг 79-модда 1-қисмига асосан маъмурий баённома расмийлаштирилиб, 9 375 000 сўм жарима ҳамда табиатга етказилган зарар учун 26 250 000 сўм қўлланилди.
Маълумот учун: Саксовул-чўлда ўсувчи дарахт кўринишидаги ўсимлик. Саксовулларнинг асосий хусусияти — саҳро тупроғини шамоллардан пана қилиб, эрозия тарқалишини олдини олади. Бу эса ҳудудлар чўллашувини олдини олади ҳамда саҳро экосистемасини сақланиб қолишини таъминлайди. Саксовулнинг танаси бурама шаклга эга бўлиб, юзаси силлиқ бўлади. Дарахтнинг шох-шаббалари қалин ва яшил тусда. Ўсимлик гуллаганда пушти ва малина рангли гулчалар пайдо бўлади. Кўринишидан омонатгина кўринса ҳам, кучли томир тизими эвазига саксовуллар чўл ва тошли ерларга мустаҳкам ўрнашади.
Бухородаги саксовул ўғрилари
Сентябрь ойида Бухоро вилояти Жондор туманида саксовул буталарини синдирган фуқарога жарима қўлланилган эди. Фуқарога нисбатан 9 452 000 сўм жарима ҳамда табиатга етказилган зарар қўлланилганди.
Шунингдек, Бухоро вилоятида сентябрь-октябрь ойлари давомида саксовул билан боғлиқ 25 та ҳуқуқбузарлик аниқлангани ҳақида хабар берилганди.
Мазкур даврда 25 та ҳолатда табиатга 29 миллион 702 минг 400 сўм зарар етказилгани ҳисобланган ва 222 миллион 900 минг сўм жарима тайинланган. Ҳуқуқбузарлар жами 252 миллион 602 минг 400 сўм товон тўлашлари белгиланган.
Аввалроқ, Бухородаги чўллардан саксовул синдириб олиб кетаётган шахсларга қарийб 40 млн сўм жарима белгиланганди.
Изоҳ (0)