Орол денгизининг суви қуриган тубида 2023 йилда “яшил қопламалар” барпо этиш учун жами 25 млрд сўм маблағлар талаб этилади. Бу ҳақда АОКАда ўтказилган брифингда Ўрмон хўжалиги агентлиги ахборот хизмати раҳбари Отабек Ашуров маълум қилди.
Отабек Ашуровнинг сўзларига кўра, 2023 йилда 100 минг гектар майдонда “яшил қопламалар” ҳимоя ўрмонзорлари барпо этилади. Ушбу “яшил қопламалар”ни барпо этиш ва хатосини тўлдириш учун жами 420 тонна саксовул, қандим, қорабуроқ каби чўл ўсимликларининг уруғларини жамғарилади. 100 гектар майдонда саксовул ва бошқа чўл ўсимликларидан ниҳолхоналар ташкил этилади.
Маʻлум қилинишича, зарур миқдордаги техника ва механизмлар, мутахассис ва ишчи-ходимлар, шунингдек, ихтиёрий равишда аҳоли ўрмон мелиоратив тадбирларни амалга ошириш учун жалб этилади.
Вазирлар Маҳкамасининг 20 январда фармойиши асосида 2023 йилда “яшил қопламалар” барпо этишни молиялаштириш белгиланди. Мазкур фармойиш бўйича Орол денгизининг суви қуриган тубида 2023 йилда “яшил қопламалар” барпо этиш учун жами 25 млрд сўм маблағлар талаб этилади.
Қайд этилишича, молиялаштириш манбаалари бўйича Экология, атроф муҳитни муҳофаза қилиш ва чиқиндилар билан боғлиқ ишларни амалга ошириш жамғармасидан 5 млрд сўм, Ўрмон хўжалигини ривожлантириш жамғармасидан 5 млрд сўм, Акциядорлик тижорат банкларидан 5 млрд сўм, Қорақалпоғистон республика бюджетининг ошириб бажарилган қисми ҳисобидан 10 млрд сўм ажратилади. Бундан ташқари, ўтган йиллардаги мавжуд қарздорликлар учун Вазирлар Маҳкамасининг захира жамғармасидан 5,5 млрд сўм мақсадли маблағларни ажратилиши кўзда тутилмоқда.
Бундан ташқари, Оролбўйи минтақаси бўлган Навоий вилоятида 50 минг гектар, Бухоро вилоятида 40 минг гектар ҳамда Хоразм вилоятида 11 минг гектар майдонда “яшил қопламалар” барпо этилди.
Эслатиб ўтамиз, аввалроқ Орол денгизининг қуриган тубида ўрмонзорлаштиришнинг навбатдаги мавсуми бошлангани хабар қилинанганди.
Изоҳ (0)