Орол денгизи тубида саксовул экиш ишлари бошланди, деб хабар бермоқда Экология, атроф-муҳитни муҳофаза қилиш ва иқлим ўзгариши вазирлиги матбуот хизмати.
Ўрмон хўжалиги Давлат қўмитаси илмий-тадқиқот институти академиги, лойиҳа раҳбари Зиновий Новицкийнинг айтишича, 2024 йили тузли ва қумли шамоллар ҳосил бўладиган энг заиф жойларда яшил майдонлар яратиш режалаштирилмоқда.
Президент Шавкат Мирзиёев 100 минг гектар майдонда қўриқланадиган ўрмонзорлар барпо этиш вазифасини қўйди. Биз 150-200 минг гектар майдонга дарахт экишни мақсад қилганмиз. Давлат раҳбари қум ва чанг бўронлари масаласини шахсан назорат қилади ва ҳозирда мамлакатда бу муаммога қарши самарали кураш олиб борилмоқда. Бу муаммони ҳал этишда ўрмон питомникларини ташкил этиш муҳим аҳамиятга эга. Жорий йилда 150 гектар майдонда питомниклар яратиш, у ерда саксовул, черкез, қандим каби чўл ўсимликларини етиштириш кўзда тутилган, – деган у.
Ўтган 5 йил давомида Орол денгизи тубида 1 млн 730 минг гектар ўрмонзор барпо этилган, яъни 17 минг км квадрат майдон кўкаламзорлаштирилган.
2024 йилда жами 150-200 минг гектар майдонда ўрмонзорлар барпо қилиш режалаштирилган. Бугунги кунгача ўрмон хўжаликлари томонидан 192,63 тонна чўл ўсимликлари уруғлари, жумладан, 71,96 тонна саксовул, 120,67 тонна қорабароқ чўл ўсимликлари терилиб, экишга тайёрланган. Шунингдек, 2,7 минг гектар майдонда саксовул, қандим, черкес каби чўлга чидамли ўсимликларнинг уруғ ҳамда кўчатлари экилмоқда.
Изоҳ (0)