Бухоро вилояти экология ва атроф-муҳитни муҳофаза қилиш бошқармаси томонидан ўтказилган матбуот анжуманида бошқарма бошлиғи Мурод Умаров ҳудудда йилнинг дастлабки 6 ойида мингдан ортиқ қонун бузилиши ҳолати аниқланганини маълум қилди.
Таъкидланишича, 2022 йилнинг биринчи ярим йиллигида 1376 та давлат экологик назорат тадбири ўтказилган. Аниқланган қонун бузилиши ҳолатлари бўйича маъмурий жарималар қўлланилган. 144 та ҳолат юзасидан 364,932 миллион сўм табиатга етказилган зарар ундирилган. Шундан атмосфера ҳавосини муҳофаза қилиш йўналишида 262 нафар ҳуқуқбузарга нисбатан 64,155 миллион сўм маъмурий жарима қўлланилган.
Сув ресурслари йўналишида 95 нафар ҳуқуқбузарга нисбатан 42,390 миллион сўм, чиқиндиларни назорат қилиш йўналишида 576 нафар ҳуқуқбузарга нисбатан 216,675 миллион сўм маъмурий жарималар ундирилган.
Ер ресурслари ва ерости бойликларини муҳофаза қилиш, биохилма-хиллик ва муҳофаза қилинадиган табиий ҳудудлар йўналишида ҳам ҳуқуқбузурларга нисбатан тегишли тартибда чора кўрилган.
Ўрмон фондига кирмайдиган дарахт кесилиши билан боғлиқ 84 та қонун бузилиши ҳолати аниқланган. 205 та мевали ҳамда манзарали дарахт кесилган, шикастланган ва зарар етказилгани учун ҳуқубузарларга нисбатан 113 миллион 400 минг сўм жарима ҳамда 98 миллион 923 минг сўм табиатга етказилган зарар ҳисобланган.
Саксовул буталарини кесиш, синдириш билан боғлиқ 28 та қонун бузилиши ҳолати аниқланиб, 37 миллион 800 минг сўм жарима қўлланилган ҳамда 33 миллион 717 минг сўм табиатга етказилган зарар ҳисобланган. Бошқа буталар, яъни қандим, юлғун, черкиз буталарини синдириш билан боғлиқ 29 та қонунбузилиш ҳолати аниқланиб, 33 миллион 750 минг сўм жарима қўлланилган ҳамда 3 миллион 100 минг сўм табиатга етказилган зарар ҳисобланган.
Ов қилиш билан боғлиқ 32 та қонун бузилиши ҳолати бўйича ҳуқуқбузарларга нисбатан 44 миллион 550 минг сўм жарима ҳамда 8 миллион 343 минг сўм табиатга етказилган зарар ҳисобланган. Шунингдек, балиқ овлаш билан боғлиқ 31 та ҳолат аниқланган бўлиб ҳуқубузарларга нисбатан 43 миллион 200 минг сўм жарима ҳамда 6 миллион 840 минг сўм табиатга етказилган зарар ҳисобланган.
Изоҳ (0)