Ўзбекистонда ўрмон фонди ерлари сўнгги олти йилда 1 миллион гектарга кенгайди. Бу ҳақда Олий Мажлис Қонунчилик палатасининг навбатдаги мажлисида Ўрмон хўжалиги агентлиги директори Низомиддин Бакиров маълум қилди.
Мажлисда у “Ўрмон фонди ерларидан самарали фойдаланиш ҳолати тўғрисида”ги ахборотни ўқиб эшиттирди. Ахборотда билдирилишича, сўнгги олти йил давомида ўрмон фонди ерлари 1 миллион гектарга кенгайиб, бугунги кунда 11,9 миллион гектарни, яъни республика умумий ер майдонининг 26,4 фоизини ташкил этади.
Ўрмон хўжалиги агентлиги томонидан 2023 йилда 235 минг гектар майдонда ўрмон барпо қилиш ва қайта тиклаш тадбирлари бажарилган, ўрмон фонди ерларининг фойдаланилмаётган 7 012 гектар майдонлари ўзлаштирилган.
Оролбўйи ҳудудларининг экологик барқарорлигини таъминлаш мақсадида Қорақалпоғистон Республикасининг Мўйноқ туманида 127,8 минг гектар, Бухоро вилоятида 40,6 минг гектар, Навоий вилоятида 43,7 минг гектар ва Хоразм вилоятида 10,6 минг гектар майдонда саксовул ва бошқа чўл ўсимликларидан “яшил қопламалар” барпо этилган.
Низомиддин Бакировнинг қайд этишича, “Яшил макон” умуммиллий лойиҳаси доирасида республика бўйича 3 миллион тупга яқин дарахтлар ва буталар кўчатлари ҳамда ниҳоллари бепул етказиб берилган, 457 гектар майдонда “яшил боғлар” барпо этилган.
Изоҳ (0)