Буюк Британия бош вазири Кир Стармер қўшинларини Украинага жойлаштиришга ва ҳаво ҳудудини қўриқлаш учун самолётларини юборишга тайёрлигини айтди. Бу ҳақда “РБК Украина” хабар берди.
Вазир Украинада тинчлик сулҳини таъминлаш учун Британия шундай қадам ташлашга тайёрлигини айтди. У буни 27 февраль куни Оқ уйда АҚШ президенти Дональд Трамп билан учрашувдан сўнг маълум қилди.
Яқинда Европада натсизм устидан қозонилган ғалабанинг 80 йиллиги нишонланади. Америка ҳамда Буюк Британия тинчликка эришиш учун елкама-елка турган эди. Ҳозир ҳам биз Украинадаги урушни тўхтатиш учун биргаликда турибмиз, деди Стармер.
У Қўшма Штатларга урушни тўхтатиш бўйича ёндашувлари учун миннатдорлик билдирди ва бу ижобий қабул қилиниши айтди.
АҚШ бу келишувни қўллаб-қувватлаш учун самолёт ва қурол-аслаҳа етказиб бериши мумкин. Фақат шу йўл билангина тинчликка эришиш мумкин. Биз Путинга бу урушни қайта бошлаш имкониятини бермаймиз. Европа раҳбарлари бу масалада бизни қўллаб-қувватламоқда, деди Стармер.
Британия бош вазири “тинчликка эришишнинг ягона йўли бўлгани учун ҳарбийларни тинчликпарвар сифатида юборган ҳолда барча чораларни кўришга тайёр” эканини таъкидлади.
Мен Европа раҳбарлари билан яқиндан ҳамкорлик қилмоқдаман ва шуни аниқ айтаманки, Буюк Британия иттифоқчиларимиз билан биргаликда келишувни қўллаб-қувватлаш учун қуруқликдаги қўшинларни юборишга ва самолётларни ҳавога кўтаришга тайёр, чунки бу тинчликнинг бардавом бўлишининг ягона йўлидир, дея қўшимча қилди у.
Трамп ва Стармер учрашуви
27 февраль куни АҚШ президенти ва Буюк Британия бош вазири Оқ уйда учрашув ўтказди. Сиёсатчилар Россиянинг Украинага қарши урушини муҳокама қилди. Трамп суҳбат чоғида АҚШ Украина ва Россия билан “яхши музокаралар” ўтказганини таъкидлаган. Шу туфайли тинчлик келишуви масаласида сезиларли ютуқлар борлигини айтган.
Учрашув чоғида Трамп Украина президенти Владимир Зеленскийни “диктатор” деб атаганига ишона олмаслигини ҳам айтган.
Мен шундай дедимми? Ишонгим келмаяпти. Навбатдаги савол, дея журналистлар саволига жавоб берди у.
Трамп Зеленскийни “диктатор” деб атагани учун ундан кечирим сўраши ҳақидаги саволга жавоб бермади.
Мен уни ҳурмат қиламан. Биз уларга кўп қурол бердик, дея хулоса қилди АҚШ раҳбари.
Америка етакчиси нодир металлар бўйича келишувни ҳам эслаган. У 28 февраль куни Украина президенти Владимир Зеленский билан уни имзолаши керак. Шу сабабли 27 февраль куни Зеленскийнинг самолёти АҚШдаги Эндрюс авиабазасига қўнгани маълум қилинди.
Изоҳ (0)