Қашқадарёда фермер хўжалиги 223 млн сўмлик электрдан ўғринча фойдаланиб келгани аниқланди 

Қашқадарё вилоятида фермер хўжалиги ўзбошимчалик билан электр энергиясидан ноқонуний фойдалангани аниқланди, деб хабар бермоқда “Ўзэнергоинспекция”. 

Унга кўра, ҳолат “Ўзэнергоинспекция” Қашқадарё вилояти ҳудудий бошқармаси ва вилоят прокуратураси ҳамкорлигида ўтказилган назорат тадбирида аниқланган. Косон тумани “Шербек” МФЙда жойлашган “У.А.Ҳ.” фермер хўжалиги сув насос қурилмаларига ҳеч қандай ҳужжатларсиз ўзбошимчалик билан электр энергиясидан ноқонуний фойдаланган.

Ушбу қоидабузарлик натижасида дастлабки ҳисоб-китобларга кўра электр таъминоти корхонасига 222,9 млн сўмлик зарар етказгани маълум бўлди.

Мазкур ҳолат юзасидан тегишли ҳужжатлар расмийлаштирилиб, ҳуқуқни муҳофаза қилувчи органларга юборилди.

Ўзбекистонда жорий йилда газ ва электр энергиясидан ноқонуний фойдаланилиши оқибатида давлат манфаатларига 98 млрд сўм зарар етказилди. 

Бундай ҳолатлар сони ортиб бормоқда

Аввалроқ Самарқанд вилоятидаги корхоналардан бири 553 миллион сўмлик электрдан ноқонуний фойдалангани аниқланганди. Шу билан бирга, Қашқадарёда 177 млн сўмлик газ ва “свет”дан ноқонуний фойдаланган шахслар ушлангани хабар қилинганди.

Шунингдек, Қашқадарёда электрдан ноқонуний фойдаланган корхона давлатга 1 млрд сўмдан зиёд зарар етказган. Бундан ташқари, Тошкент, Самарқанд ва Қашқадарё вилоятларида энергия ресурсларига ноқонуний уланиш ҳолатлари фош этилганди. Шунингдек: 

• Бухорода 1,2 млрд сўмлик электрдан ноқонуний фойдаланилгани аниқланди
• Қорақалпоғистоннинг учта ҳудудида 845 млн сўмлик газдан ноқонуний фойдаланилди
• Бухоро ва Жиззахда электрдан ноқонуний фойдаланганлар 360 млн сўмдан зиёд зарар етказди
• Учта вилоятда қарийб ярим млрд сўмлик газдан ноқонуний фойдаланилди

Газни ўғирлаётган оҳак цехлари

Март ойида Самарқанд вилоятининг Пахтачи туманида 4 млрд сўмлик табиий газдан ноқонуний фойдаланилган яширин оҳак цехи фош этилган эди. Апрелда эса Фарғонада 69,4 млн сўмлик табиий газдан ноқонуний фойдаланган оҳак цехи аниқланган.

Май ойида эса яна Фарғонада 289 млн сўмлик табиий газдан ноқонуний фойдаланиб, оҳак цехи ташкил этилганлиги аниқланган эди. Август ойида Самарқандда 3,3 млрд сўмлик табиий газдан ноқонуний фойдаланиб, оҳак цехи ташкил этган шахс ушланганди. 

Сентябрда Фарғонада газдан ноқонуний фойдаланган оҳак цехи масъуллари давлатга 5,5 млрд сўмдан зиёд зарар етказди. Шу билан бирга, айнан Фарғона шаҳрида ноқонуний оҳак ишлаб чиқариш цехи ташкил қилиб, 544,6 млн сўмлик табиий газни ўғирлаганлар қўлга тушган эди.