АҚШ Молия вазирлиги Сурияга қарши санкцияларни расман бекор қилди. Қарор президент Дональд Трампнинг июнь ойида Дамашққа қарши санкцияларни тугатиш ҳақидаги фармойишидан кейин қабул қилинган. Бу ҳақда Al Arabiya хабар берди.
Эндиликда АҚШ компанияларига Сурия билан бизнес қилишга рухсат берилади. Молия вазирлиги ҳузуридаги Ташқи активларни назорат қилиш бошқармасига (OFAC) кўра, ўзгариш 26 август куни кучга киради. Бу 2004 йилдан буён амал қилиб келаётган санкциялар бекор қилинишини англатади.
Мазкур қарор 2024 йил декабрь ойида Башар Асад режими қулагач, ҳокимиятга “Ҳайъат Таҳрир аш-Шом” раҳбари Аҳмад аш-Шараъа келгач, қабул қилинди. АҚШ президенти 2025 йил июнь ойида Сурияга қарши санкцияларни бекор қилишни буюрганди.
OFAC миллий фавқулодда вазиятнинг тугатилиши ва АҚШнинг Сурияга нисбатан сиёсатидаги кейинги ўзгаришлар натижасида Федерал қонунлар тўпламидан Сурияга қарши санкциялар бўйича қоидаларни чиқариб ташламоқда, дейилади АҚШ Молия вазирлиги баёнотида.
Шу билан бирга, АҚШнинг барча санкциялари бекор қилиниши учун Конгресс 2019 йилги “Сезар қонуни”ни бекор қилиши лозим. Сиёсатчилар ҳозир ёзги таътилда, бироқ келаси ой Вашингтонга қайтгач, бу масала кўриб чиқилиши кутилмоқда. Ҳозирча эса Сезар санкциялари вақтинча — 180 кунга тўхтатиб қўйилган.
АҚШ нима учун Сурияга санкция қўллаганди?
Дастлабки санкциялар 2004 йил май ойида чиқарилган 13338-сонли президент фармони орқали жорий этилган. Бунга сабаб сифатида Суриянинг терроризмни қўллаб-қувватлаши, Ливанга босқин, қурол дастурлари ва Ироқдаги барқарорликни издан чиқаришга қаратилган ҳаракатлари келтирилган.
2005 йил апрелида OFAC ушбу фармонни амалга ошириш учун Сурия бўйича санкция қоидаларини чиқарган. Кейинчалик турли президент фармонлари орқали бу санкциялар янада кенгайтирилган. 14312-сонли янги фармон эса Сурия бўйича санкцияларни бекор қилади. Бироқ террористик ташкилотлар, инсон ҳуқуқларини бузган шахслар ҳамда кимёвий қурол билан боғлиқ шахсларга қарши чораларни сақлаб қолади.
Изоҳ (0)