Франциялик ҳужумчи Уго Экитике сўнгги 12 йил ичида “Ливерпуль” сафида илк учта ўйинида гол уришга муваффақ бўлган икки футболчидан бирига айланди. Бу ҳақда Championat нашри хабар бермоқда.
23 ёшли форвард Англия Премьер Лигаси 2-тури доирасидаги “Ньюкасл”га қарши баҳснинг (3:2) 46-дақиқасида ўзининг “қизиллар” сафидаги навбатдаги голини киритишга муваффақ бўлди. Аввалроқ у Англия Суперкубоги доирасида “Кристал Пэлас”га қарши ўйинда (2:2, пенальтилар серияси – 2:3) ҳамда АПЛнинг 1-туридаги “Борнмут”га қарши беллашувда (4:2) рақиб дарвозасини ишғол қилган эди.
Экитикедан аввал бундай натижага “Ливерпуль” сафида фақатгина англиялик ҳужумчи Даниэль Старриж эришган. У 2013 йилда “Челси”дан “қизиллар” жамоасига ўтган ва клуб сафидаги дастлабки тўрт учрашувда ҳам гол уришга муваффақ бўлган.
Эслатиб ўтамиз, Уго Экитике 2025 йилги ёзги трансфер ойнаси вақтида Германиянинг “Айнтрахт” клубидан 95 миллион евро эвазига “Ливерпуль”га кўчиб ўтган.
Маълумот ўрнида: “Ньюкасл” ҳамда “Ливерпуль” жамоалари ўртасида бўлиб ўтган учрашувда мерсисайдликлар 3:2 ҳисобида зафар қучди. Айни пайтда Арне Слот бошчилигидаги жамоа дастлабки икки турдан кейин 6 очко жамғариб, мусобақада 100 фоизлик натижа қайд этиб турибди. Шунингдек, “Арсенал” ва “Тоттенҳэм” жамоалари ҳисобида ҳам 6 очко мавжуд.
Экитике ҳозирга қадар мерсисайдликлар сафида 3 та учрашувда майдонга тушиб, 3 та гол ва 1 та голли узатмага муаллифлик қилган. Футболчининг “Ливерпуль” клуби билан тузган шартномаси 2031 йилнинг ёзига қадар амал қилади. Transfermarkt портали ҳужумчининг қийматини 75 миллион евро деб баҳолаган.
Изоҳ (0)