Афғонистон октябрь ойида АҚШ ва Марказий Осиё мамлакатлари ўртасида савдо ва инвестициялар бўйича ҳадли битим (TIFA)нинг тўлақонли аъзосига айланади. Бу ҳақда Ўзбекистон Ташқи ишлар вазирлиги матбуот хизмати хабар бермоқда.
АҚШ ва Марказий Осиёнинг беш мамлакати 2004 йили савдо ва инвестициялар соҳасидаги муносабатларни ривожлантириш бўйича ҳадли битим (Framework Trade and Investment Agreement, TIFA)ни имзолаган эди.
Ўзбекистон ташқи ишлар вазири Абдулазиз Комилов 22 сентябрь, якшанба куни Нью-Йорк шаҳрида бўлиб ўтган Марказий Осиёнинг беш мамлакати ва АҚШ ташқи сиёсат идоралари раҳбарларининг «C5+1» шаклидаги навбатдаги учрашувида иштирок этди. Эслатиб ўтамиз, ТИВ раҳбари мамлакатнинг БМТ Бош ассамблеяси 74-сессиясида иштирок этаётган делегациясига раҳбарлик қилмоқда.
«Мамлакатимиз АҚШ ва Марказий Осиё мамлакатлари ўртасида савдо ва инвестициялар бўйича ҳадли битим (TIFA) кенгашининг шу йил октябрь ойида Вашингтон шаҳрида бўлиб ўтадиган навбатдаги мажлисида Афғонистонга TIFA тўла қонли аъзоси мақомини беришни қўллаб-қувватлайди», — дейилади вазирликнинг учрашув якунлари бўйича эълон қилинган ахборотида. Шу билан бирга, Ўзбекистон томони «ер устидаги кўприк» бўлиши мумкин бўлган Афғонистонни минтақавий иқтисодий жараёнларга фаол жалб қилинишига алоҳида эътибор қаратмоқда.
Учрашувдаги нутқида Абдулазиз Комилов Ўзбекистон «C5+1» доирасидаги кўп қиррали ҳамкорликни илгари суришда фаол тарафдор бўлиб қолишини таъкидлаган. Хусусан, Ўзбекистон инфратузилма, транспорт, коммуникация, маданий-гуманитар, илм-таълим соҳасидаги алоқаларни янада ривожлантириш муҳим деб ҳисоблаши ва Орол фожиаси оқибатларини бартараф этишда ёрдам жалб этишдан манфаатдорлигини изҳор этиши қайд этиб ўтилган.
«‘C5+1’ учрашуви доирасида Ўзбекистон ТИВ раҳбари ва АҚШ Давлат котиби Майкл Помпео ўртасида қисқа суҳбат бўлиб ўтди. Ўзбекистон—АҚШ кун тартибидаги долзарб масалалар муҳокама қилинди», — дея қўшимча қилинган ТИВ ахборотида.
Ўзаро муносабатларнинг янги формати ҳисобланган «Марказий Осиё—АҚШ» («C5+1») мулоқоти 2015 йил сентябрида, минтақавий масалаларни ҳал қилиш мақсадида АҚШ ва Марказий Осиёнинг беш мамлакати — Ўзбекистон, Қозоғистон, Қирғизистон, Тожикистон ва Туркманистон томонидан тузилган эди.
Изоҳ (0)