“Абу Али ибн Сино каби улуғ шахсларнинг мероси бутун минтақа ва бутун дунёга тегишлидир” — Бобур Бекмуродов

Аввалроқ Тожикистон маданият вазири Матлубахон Сатториён Американинг CNN телеканалининг Абу Али ибн Сино ўзбек олими сифатида тилга олинган материалига муносабат билдириб, Ибн Синонинг тожиклигини даъво қилганди. “Юксалиш” ҳаракати раиси Бобур Бекмуродов ушбу масала юзасидан фикрларини билдирди.

Бобур Бекмуродов сўнгги йилларда Марказий Осиё давлатлари ўзаро дўстона алоқаларни мустаҳкамлаб, умумий муаммоларни биргаликда ҳал этишга интилаётганини таъкидлади.

“Халқларимизни чуқур тарихий илдизлар, маданий қадриятлар ва келажакка муштарак назар бирлаштиради.

Абу Али ибн Сино каби улуғ шахсларнинг мероси бутун минтақа ва бутун дунёга тегишлидир. Шу нуқтаи назардан, Тожикистон маданият вазирининг CNN нашрида чоп этилган мақола юзасидан билдирган эътирози афсусланарли. Бундай баёнотлар Марказий Осиё якдиллиги ва бирдамлиги руҳига мос эмас.

Бугун биз “бу сеники” ёки “бу меники” деб эмас, асосий эътиборимиз минтақамизнинг келажаги учун муҳим бўлган реал ижтимоий, сиёсий ва иқтисодий муаммоларга қаратилиши керак”, деб ёзади Қонунчилик палатасининг Тадбиркорлик, рақобатни ривожлантириш ва саноат қўмитаси раиси.

Бобур Бекмуродов Марказий Осиё давлатлари иқлим ўзгариши, иқтисодий ўсишнинг барқарорлиги ва хавфсизлик каби жиддий муаммолар билан юзлашаётганини айтиб ўтди. 

“Уларни ҳал этиш учун ўзаро ҳамкорликни кучайтиришимиз, биргаликда  ривожланиш устида бош қотиришимиз зарур. Биз ўзаро ҳурмат, ишонч ва умумий фаровонликка интилиш йўлига содиқмиз”, дея қўшимча қилган у.

Аввалроқ Ўзбекистон журналистика ва оммавий коммуникациялар университети ректори Шерзодхон Қудратхўжа ушбу ҳолат бўйича изоҳ берганди.

Шерзодхон Қудратхўжа Абу Али Ибн Синонинг миллати тўғрисидаги савол қанчалик ўринсиз бўлса-да, бундай ёндашув икки томонлама муносабатларга салбий таъсир қилмай қолмаслигини алоҳида ёзди. 

Ва шубҳасиз, учинчи тараф  бундай ҳоллардан ўзининг ғараз мақсадларидафойдаланади. Биз бугун катта минтақада яшар эканмиз, илм-фан, адабиёт, маърифат соҳасида чўққига чиққан улуғ олимларни сеники, меники демасдан бир заминда яшаган боболаримизнинг муносиб фарзандлари бўлишимиз керак, дея қўшимча қилган сиёсий фанлар доктори.