«Толибон» 8 июль куни Тожикистон билан чегарадош Панж дарёсидаги кўприкда ўз байроғини кўтарди. Бу ҳақда «РИА Новости» хабар берди.
«5 июль куни Афғонистон ҳукумати қўшинларининг чегара постини эгаллаб олган ‘Толибон’ бугун (8 июль) Панж дарёсини кесиб ўтган Тожикистоннинг «Тем» назорат пункти қаршисидаги икки давлатни боғловчи кўприкнинг ён томонидаги устунга байроқ ўрнатди», — деди Тожикистоннинг Тоғли Бадахшон автоном вилояти маъмурияти вакили.
Таъкидланишича, 5 июлга ўтар кечаси ҳужумга ўтган «Толибон»га афғон чегарачилари назорат пунктини жангсиз топширган. Ушбу кўприк орқали 312 нафар чегарачи ва ҳарбий хизматчилар Тожикистон ҳудудига ўтишга муваффақ бўлган.
«Спутник Тажикистан» хабарига кўра, Коллектив хавфсизлик шартномаси ташкилоти (КХШТ) қўшма штаби бошлиғи генерал-полковник Анатолий Сидоров «Толибон» тожик-афғон чегарасининг деярли юз фоизини назорат қилаётганини айтди.
«Бир ой олдин ‘Толибон’ вакиллари Афғонистон давлат чегарасининг қисмларини эгаллашни бошлади. Июль ойининг бошига келиб улар чегаранинг 700 километрни ўз назоратига олди. Биз Тожикистонга келган вақтга қадар деярли бутун давлат чегараси тўлиқ назоратга олинган эди. Тожикистон Республикаси билан ушбу чегара қисми 1344 километрни ташкил қилади», — дея таъкидлади Сидиров.
«Толибон» вакили Забиулла Мужоҳид «РИА Новости» билан суҳбатда жангарилар Афғонистоннинг турли вилоятларидаги жами 169 та туманни эгаллаб олганини айтди.
Ҳаракат вакилининг сўзларига кўра, сўнгги икки ой ичида «Толибон» 400 га яқин туманнинг 167 тасини эгаллаб олган, 7 июль куни яна иккита туман — Ҳирот ва Зобулни ўз назоратига олган. «Бизнинг мужоҳидларимиз томонидан қўлга киритилган туманларнинг умумий сони 169 тага етди», — деди Забиулла Мужоҳид агентликка.
Шунингдек, «Толибон» мамлакат ҳудудининг 85 фоизи устидан назорат ўрнатганини даъво қилмоқда. Ўз навбатида, Афғонистон Мудофаа вазирлигининг собиқ вакили генерал Давлат Вазирий бу баёнотни рад этди.
«Толибонънинг даъвоси ҳақиқатга тўғри келмайди, илгари ҳам ҳаракат вакиллари ҳудудларнинг 60 ёки 70 фоизидан кўпроғини назорат қилаётгани ҳақида асоссиз гапирган», — деди у.
Айни пайтда, хавфсизлик ва мудофаа соҳаси вакили генерал Ажмал Шинфарининг айтишича, ҳудудлар жангарилар қўлига ўтмаган, хавфсизлик кучлари туман учун курашиш мақсадида қайта тўпланиш доирасида тактик чекинишни амалга оширган. Унинг сўзларига кўра, яқинда ҳарбийлар 14 туманни қайтариб олган.
«Толибон» ҳаракати Афғонистоннинг Эрон билан чегарасидаги назорат-ўтказиш пунктини эгаллаб олди. Бу ҳақда Associated Press (AP) афғон расмийлари ва маҳаллий оммавий ахборот воситаларига таяниб хабар берди.
«Толибон» вакилининг Twitter’да маълум қилишича, назорат пункти жойлашган Ислом Қалъа шаҳрида маҳаллий аҳоли жангариларни илиқ кутиб олган. Шунингдек, у жангарилар ўзларининг юк машиналарини шаҳар бўйлаб ҳайдаб ўтаётгани ва оломон уларни олқишлаб кутиб олаётгани акс этган видеони жойлаштирди.
Ислом Қалъа — ғарбий Ҳирот вилоятидаги чегара ёқасида жойлашган аҳоли пункти. У вилоят марказидан 120 км узоқликда жойлашган. Эрон ОАВ хабарларига кўра, шаҳарда бўлган афғон аскарлари ўз позицияларини тарк этиб, бошпана излаб Эронга йўл олган.
Изоҳ (0)