Душанбе шаҳрида 10 июль куни президент Эмомали Раҳмон ва унинг ўғли пойтахт ҳокими Рустам Эмомали иштирокида Тожикистондаги иккинчи уч қаватли эстакаданинг очилиш маросими ўтказилди. Тожикистон президенти матбуот хизматининг қайд этишича кўприк Сино ва Исмоил Сомоний шоҳкўчаларидан Душанбе дарвозаларигача бўлган ҳудудни бир-бирига боғлайди.
Чорраҳа уч қават ва ҳалқасимон йўлдан иборат. Учинчи босқичда 125 метрлик кўприк бунёд қилинган. Пиёдалар учун тўртта ерости ўтиш жойлари қурилган.
Ушбу йўл Ўзбекистонга олиб чиқадиган Душанбе—Турсунзода магистралининг бир қисмига айланди. Лойиҳа Европа тикланиш ва тараққиёт банки томонидан молиялаштирилган ва унга 65 миллион АҚШ доллар миқдоридаги маблағ ажратилган, шунингдек, Осиё инфртузилма инвестициялари банки, Словакия ҳукумати ва бошқа донорлар ҳам лойиҳада иштирок этган. Асосий пудратчи ташкилот Хитойнинг Xinjiang Communications Construction Group Cо. компанияси бўлди, Испаниянинг Eptisa консалтинг компанияси эса иш сифати устидан назоратни амалга оширган.
Мавзуга доир: Тошкентдаги уч поғонали йўл Марказий Осиёда ягона эмас
Кўп қаватли йўлларни қуриш Тожикистонда 2016 йилда бошланган. Душанбеда дастлабки уч қаватли эстакада 2018 йил ёзида фойдаланишга топширилган. Душанбенинг 2030 йил учун янгиланган асосий қурилиш режасида 20 та янги эстакадани фойдаланишга топширилиши белгилаб қўйилган.
Аввал уч қаватли йўллар Марказий Осиёда Олмаотада 2016 йилда, Ашхободда 2017 йилда, Душанбеда 2018 йилда, Тошкентда 2020 йилда фойдаланишга топширилганди.
Изоҳ (0)