АҚШ Россия ва Хитой томонидан қитъага бўлаётган таҳдиддан кўра, Европанинг "ичкарисидан келаётган хавф"дан кўпроқ хавотирда. Бу ҳақда Мюнхен хавфсизлик конференциясида Америка вице-президенти Ж.Д.Венс айтиб ўтди.
“Европага нисбатан мени энг кўп ташвишга солаётган таҳдид бу Россия ёки Хитой эмас. Мен ичкаридан келаётган таҳдид — Европанинг энг асосий қадриятларидан чекинишидан хавотирдаман”, деди Венс.
Вице-президент Руминияда Россия аралашуви баҳонасида конституциявий сайловлар бекор қилинганини мисол қилиб келтирди. Шунингдек, у Европа давлатларида цензура ва миграция сиёсатини танқид қилди. “Бугун Европага қараганимда, “Совуқ уруш” ғолибларининг баъзилари қандай аҳволга келиб қолганини кўриб ҳайрон бўламан”, — дея хулоса қилди Венс.
2024 йил октябрь ойида Европа Иттифоқининг мудофаа бўйича биринчи комиссари лавозимига номзод Андриус Кубилиус блок Россия билан юзага келиши мумкин бўлган қарама-қаршилик учун ҳарбий салоҳиятини ошириши ва “олти-саккиз йил ичида ҳарбий тўқнашувга” тайёр туриши кераклигини айтди.
Еврокомиссия раҳбари Урсула фон дер Ляйен эса ҳам Европа Иттифоқининг ҳарбий харажатларини ошириш тарафдори.
Бу йил Мюнхен конференциясида Қўшма Штатлардан Ж.Д.Ванс, Давлат котиби Марко Рубио ва Россия ҳамда Украина бўйича махсус вакил Кейт Келлогг иштирок этмоқда. Россия вакиллари Мюнхен конференциясига 2022 йилдан бери келмаяпти.
Изоҳ (0)