АҚШ президенти Дональд Трампнинг Оқ уйга қайтиши ва унинг давлат раҳбари сифатидаги илк баёнотлари электрошокка ўхшайди ва Европани ўз хавфсизлиги ҳамда Украина келажаги учун масъулиятни ўз зиммасига олиши керак. Бу ҳақда Франция президенти Эммануэл Макрон Financial Times нашрига берган интервьюсида маълум қилди.
Бу электрошок. Бизга ассиметрик зарбалар, ташқи силкинишлар зарур, деди Франция раҳбари.
Унинг фикрича, Трампнинг ҳаракатларини Европа иттифоқини ўз мудофаасига, иқтисодий ва технологик тикланишга сармоя киритишга ундайдиган туртки сифатида баҳолаш керак. Европа давлатлари “мушакларини кучайтириши” ва бу масалаларга кўпроқ эътибор қаратиши лозим:
Европа учун бу тезлашиш ва ҳаракат қилиш пайти, деди Эммануэл Макрон.
У Европа Америка қуролларига, хусусан, Патриот зенит-ракета комплексларига қарамликдан қутулиши лозимлигини айтди ва ҳамкорларни Франция—Италия САМП-Т ҳаво мудофаа тизимини харид қилишга чақирди.
Бундан ташқари, биз тўлиқ интеграциялашган Европа мудофаа, саноат ва технологик базасини ишлаб чиқишимиз лозим, деди у.
Таъкидланишича, Макрон АҚШ ва Россия раҳбарларининг Украинадаги урушни тугатиш бўйича музокараларига Европа етакчиларига қараганда оптимистик муносабатда бўлган.
АҚШнинг вазифаси “бу мулоқотни қайта бошлаш” ва ташаббусни ўз қўлига олиш, Европанинг вазифаси эса Украина учун хавфсизлик кафолатларини ва “кенгроқ маънода бутун минтақа хавфсизлиги”ни муҳокама қилишдан иборат, дея фикр билдирган Макрон.
У фақат Украина президенти Владимир Зеленский ўз мамлакати номидан музокаралар олиб бориши мумкинлигини таъкидлаб, “таслим бўлишга олиб келадиган тинчликка” йўл қўймасликка чақирган.
Ҳозирги босқичдаги ягона савол шундан иборатки, президент Путин чиндан ҳам шу асосда ўт очишни тўхтатишга рози бўлишга тайёрми? Шундан сўнг украинликлар Россия билан музокаралар олиб бориши зарур бўлади, дея таъкидлади у.
Изоҳ (0)