Жорий йил апрель—июнь ойларида мамлакатдаги қатор соҳаларда ишчи кучига талаб юқори шаклланди. Бу бўйича Марказий банк очиқ манбаларда онлайн эълон қилиб бориладиган иш ўринлари маълумотларини ўрганди.
Таҳлилга кўра, 2025 йил II чорагида меҳнат бозорида таклиф этилаётган бўш иш ўринлари сони I чоракдагидан 28,7 фоизга ошган. Энг кўп иш таклифларини савдо (19,4 фоиз), умумий овқатланиш (17,5 фоиз) ва ишлаб чиқариш (16,8 фоиз) корхоналари билдирган.
Ўтган чоракда махсус кўникма ва малакага эга бўлган иш қидирувчилар томонидан фойдаланиладиган манбаларда фаол меҳнат аризалари (резюмелар) сони кўпайган. Савдо, хизмат кўрсатиш, маркетинг ва реклама соҳаларида резюмелар сони сезиларли ошган. Шу билан бирга, жорий йил давомида онлайн иш қидириш фаоллиги динамикаси сўнгги йилларга нисбатан пасайиш тенденциясини намоён этган.
“2025 йил II чорагида вакансиялар сони ўсиши мавсумий омиллар, жумладан иқтисодий фаоллик жонланиши ва талаб ошиши билан боғлиқ. Бироқ вакансиялар сони ортиб бориши шароитида онлайн иш қидириш фаоллиги пасайиши меҳнат бозорида талаб ва таклиф ўртасида номутаносибликлар кузатилаётганини билдиради”, дейилади манбада.
Марказий банк ўтказган иқтисодий фаоллик бўйича сўровда келгуси ойларда иш ўринлари сонини оширишни кутаётган тадбиркорлар улуши пасайган. Жумладан, II чорак давомида ўртача 30,2 фоиз (I чоракда 36,3 фоиз бўлган) тадбиркорлар келгуси уч ойда иш ўринлари сонини оширишини билдирган. Иш ўринларини кўпайтиришини қайд этган тадбиркорлар улушидаги пасайиш асосан саноат ва хизматлар соҳаларида кузатилган. Бунда саноат соҳасидаги респондентларнинг 26,8 фоизи (ўтган йил мос даврида 33,7 фоиз), хизматлар соҳасида эса 29,1 фоизи (32,4 фоиз) келгуси даврларда иш ўринлари сонини оширишни режалаштирган.
Ўтган чоракда иш ўринлари сонини жорий ҳолатда сақлаб қолишни билдирган тадбиркорлар улуши I чоракдаги ўртача 56,4 фоиздан II чоракда 61,2 фоизгача ўсган.
2025 йил II чорагида мамлакатда иш ҳақининг номинал ўсиш суръати йиллик 17,2 фоиз, реал ўсиш суръати 7,3 фоиз бўлган.
“Бунда ўртача ойлик иш ҳақи қарийб 6 миллион сўмга тенг бўлди. Соҳалар кесимида молия ва суғурта, ахборот ҳамда коммуникация хизматлари йўналишларида ўртача иш ҳақининг бошқа соҳаларга нисбатан юқори шаклланиши сақланиб қолди (мос равишда 16,3 ва 14,8 миллион сўм)”, дея қайд этган Марказий банк.
II чорак давомида ахборот, транспорт ва ижтимоий хизматлар ходимларининг иш ҳақи қолган тармоқлар ишчилариникига қараганда реал ва номинал қийматларда юқорироқ ўсган. Иш ҳақининг энг кам ўсиши қурилиш соҳасида кузатилган. Қурувчилар ўртача иш ҳақи номинал қийматда йиллик 6,1 фоизга ошган бўлса-да, реал қийматда 2,8 фоизга камайган.
2025 йил 1 июль ҳолатига кўра, Ўзбекистон иқтисодиётида 14,6 миллион киши иш билан банд, ишсизлар сони эса 800 минг нафарни ташкил этган. Меҳнат бозорида қамраб олинмаган аҳоли, жумладан болалар, талабалар, нафақахўрлар ва бошқалар сони 22,5 миллион нафар. Шундан меҳнатга лаёқатли ёшгача бўлган аҳоли сони 12 миллион нафарга тенг.
Изоҳ (0)