Навоий вилоятида банкоматни ўғирлаб кетган шахслар қўлга тушди. Бу ҳақда вилоят ИИБ матбуот хизмати хабар қилди.
Маълум бўлишича, жорий йилнинг 4 августидан 5 августга ўтар кечаси қўлларига тиббиёт қўлқоплари ва юзларига ниқоб таққан 2000, 2002 ва 2004 йилларда туғилган шахслар давлат рақами мавжуд бўлмаган машинада “Тараққиёт” МФЙда жойлашган банкоматни ўғирлаб кетган.
Ушбу пул жўнатиш қурилмасида 5 миллион 263 минг сўм пул маблағлари бўлган. Олиб борилган тезкор қидирув ишлари натижасида 3 нафар гумонланувчи навбатдаги ўғриликни амалга оширмоқчи бўлаётган пайтларида қўлга олинган.
Мазкур ҳолатда давлат манфаатларига 36 миллион 763 минг сўм миқдорида зарар етказилгани аниқланди.
Гумонланувчиларга нисбатан Жиноят кодексининг тегишли моддалари билан жиноят иши қўзғатилиб, айни пайтда тергов ҳаракатлари олиб борилмоқда.
Аввалроқ шу каби ҳолат Тошкент шаҳрининг Учтепа туманида ҳам кузатилганди. Унда гумонланувчилар воқеа жойида банкоматни кўтариб машина юкхонасига жойлаштиришга уринганида уни оғирлигидан тушириб юборган ва воқеа жойидан қочиб кетишган.
Изоҳ (0)