Англия Премьер Лигасида ёзги трансфер ойнаси якунланишига бир ҳафтадан ортиқ вақт қолган бўлса-да, харажатлар бўйича рекорд янгиланди. Яқинда “Лидс Юнайтед” Италиянинг “Милан” клубидан ҳужумчи Нуҳ Окафорни 18 миллион фунт эвазига харид қилди. Шунингдек, “Борнмут”нинг “Байер”дан Амин Адлини қўлга киритиши ортидан АПЛнинг умумий трансфер харажатлари 2023 йилнинг ёзида қайд этилган рекорд — 2,36 миллиард фунт стерлингдан (3,7 миллиард АҚШ доллари) ошиб кетган.
Трансфер ойнаси якунига қадар яна бир нечта йирик шартномалар имзоланиши кутилмоқда. Агар “Арсенал” “Кристал Пэлас” етакчиси Эберечи Эзени сотиб оладиган бўлса, умумий сарф-харажатлар 3 миллиард фунтга (4,03 миллиард доллар) етиши мумкин.
Ушбу харажатлар ичида энг катта маблағни “Ливерпуль”, “Челси”, “Манчестер Юнайтед” ва “Арсенал” амалга оширган бўлса-да, ўртамиёна жамоалар ҳам ўз шахсий рекордларини янгилаб олди.
Мисол учун, “Ливерпуль” “Байер” ярим ҳимоячиси Флориан Вирц учун 116 миллион фунт (156 миллион доллар) тўлаб, клуб тарихидаги энг қиммат трансферни амалга оширди. “Бёрнли” эса “Челси” ярим ҳимоячиси Лесли Угочуквуни 25 миллион фунт (33,5 миллион доллар) эвазига харид қилиб, шахсий рекордини янгилади.
АПЛга қайтган яна бир клуб — “Сандерленд” “Страсбург”дан Ҳабиб Диаррани 26 миллион фунт (34,9 миллион доллар) эвазига сотиб олди. Клуб умумий ҳисобда 142 миллион фунтлик (190,5 миллион доллар) трансферларни амалга оширди. “Сандерленд” саккиз йиллик танаффусдан сўнг АПЛга қайтди ва Европадаги қолган барча лигалари клублари орасида энг кўп харажат қилган жамоага айланди (“Реал” ҳамда “Атлетико” бундан мустасно).
“Ноттингем Форест” эса ёзда икки марта шахсий рекордини янгилаб, умумий ҳисобда 150 миллион фунт (201,3 миллион доллар) сарфлади. Клуб “Болонья”дан Дан Ндои ҳамда “Ипсвич Таун”дан Омари Ҳатчинсонни ўз сафига қўшиб олди.
Шу тариқа, АПЛ клубларининг жорий ёзги трансферлардаги умумий харажатлари Италия А серияси, Германия Бундеслигаси, Франция Лига 1 ва Испания Ла Лигасининг жами трансфер харажатларидан ҳам юқори бўлди.
Маълумот учун, иккинчи ўринда Италия А Серияси бормоқда. Мамлакат клублари бу ёзда 783 миллион фунтлик (1,05 миллиард доллар) трансфер амалга оширган. Бироқ улар ўз харажатларини сотувдан тушган даромад эвазига деярли қоплаб олишга муваффақ бўлган.
Изоҳ (0)