Сайёрамизнинг энг бой одами Илон Маск АҚШ Конгресси учун оралиқ сайловларда республикачиларга овоз беришга чақирди. Маскнинг фикрича, ҳукуматнинг ижро ва қонун чиқарувчи тармоқларида турли сиёсий кучларнинг бўлиши ҳар икки партия фаолиятининг «ёмон тус олишини» чеклайди. Миллиардер ўзи ҳам «мустақил» сайловчи эканини таъкидлади, аммо амалда у деярли ҳар доим демократларга овоз бериб келган.
«Ҳокимиятларнинг бўлиниши ҳар икки партия фаолиятининг ёмон тус олишини чеклайди, шунинг учун президент демократ бўлганини ҳисобга олиб, республикачилар Конгрессига овоз беришни тавсия қиламан», — деб ёзди Маск Twitter’да.
Миллиардернинг таъкидлашича, республикачилар ва демократлар «нариги томон» учун овоз бермайди, масалани «мустақил сайловчилар» ҳал қилади.
Аввалроқ АҚШ президенти Жо Байден Илон Маск томонидан Twitter’нинг сотиб олинишига фикр билдирар экан, ижтимоий тармоқни «ёлғон тарқатувчи» восита деб атаганди. Компаниядаги ходимларнинг ишдан бўшатилишига муносабатида у «Америкада энди муҳаррирлар йўқ»лигини айтди.
Конгрессга сайловлар 8 ноябрь куни бўлиб ўтади. Америкаликлар Конгресс Вакиллар палатаси ва Сенатининг учдан бир қисмини қайта сайлайди. Ҳозирда иккала палата ҳам демократлар томонидан назорат қилинади.
Изоҳ (0)