АҚШ Демократлар партияси аъзолари томонидан таклиф этилган янги «миллиардерлар учун солиқ» кўплаб бадавлат америкаликларни мамлакатни тарк этишга мажбур қилади. Бу ҳақда АҚШнинг собиқ президенти Дональд Трамп маълум қилди. Трампнинг сўзларини унинг вакили Лиз Харрингтон Twitter’даги саҳифаси орқали эълон қилди.
«Қайси мамлакат ‘миллиардерлар солиғи’ ёки бойлик учун солиқда асосий бенефициар бўлади? Бадавлат инсонлар ва компаниялар Қўшма Штатларни ёрдамсиз аҳволда ташлаб, қаерга кўчиб кетади?», — деб ёзади собиқ президент.
Трампнинг фикрича, бадавлат инсонларнинг аксариятидан АҚШда бўлиш талаб этилмайди. «Мен доно бошқарувчиларга эга ушбу мамлакатларнинг барчасини биламан ва улар Конгрессдаги радикал сўл маняклар нима қилаётганига қизиқади», — дейди собиқ президент.
«РБК»нинг ёзишича, шунингдек, мазкур қонун лойиҳасига SpaceX ва Tesla компаниялари асосчиси Илон Маск ҳам қарши чиққан. У АҚШнинг давлат қарзи салкам 28,9 триллион долларга ёки ҳар бир америкалик солиқ тўловчи учун 229 минг доллар тўғри келишини кўрсатиб ўтган. «Барча миллиардерларга 100 фоизли солиқ ўрнатилган тақдирда ҳам, бу қарзнинг бир қисмини ёпади, шундай экан, қолган қисми кенг оммадан олиниши кераклиги равшан. Бу математиканинг асослари», — деб ёзади Маск. Tesla асосчиси мамлакатнинг асосий муаммоси харажатлар эканини қайд этиб, АҚШ ҳукуматининг миллиардерлардан олган пуллари тугаса, «сизнинг пулларингизни олгани келади», дея қўшимга қилган.
«Миллиардерлар солиғи»ни жорий этишни Орегон штати губернатои Рон Уайден эълон қилган. Режага кўра, АҚШдаги бадавлат инсонлар сотилаётган акциялар ва облигациялар қийматининг 23,8 фоизи миқдорида ҳар йили солиқ тўлаши керак бўлади. Демократларнинг режасига кўра, қонун президент Жо Байден администрациясининг ижтимоий дастурини молиялаштиришга имкон беради. Режага кўра, қонун 2022 йилда кучга киради ва капитали 1 миллиард ёки сўнгги уч йил ичида йиллик даромади 100 миллион долларга тенг инсонларга тааллуқли бўлади.
Аввалроқ Трамп 25 йил ичида илк бор Forbes’нинг энг бой америкаликлар рўйхатига киритилмагани, Маск дунёнинг энг бадавлат инсонига айлангач, Безосга 2 рақами туширилган улкан ҳайкал ва кумуш медал юборгани тўғрисида хабар берилганди.
Изоҳ (0)